Pasaiako Portu Agintaritzak eta ADIFek izenpetu dute akordioa.
Íñigo de la Serna Hernáiz Sustapen Ministroa eta Ricardo Peña, Pasaiako Portu Agintaritzako burua.
Pasaiako Portu Agintaritzak bere trenbide bidezko loturak hobetzeko lanean dihardu eta, gaur, norabide horretan, aurrera urrats garrantzitsua egin duela iragarri dute Agintaritzako iturriek. ADIFekin hitzarmena sinatu du gaur Portu Agintaritzak, Bartzelonako SIL azoka logistikoan.
Portuak hobekuntza lanak egin asmo ditu Lezo eta Errenteriako tren geltokian, gerora 550 metroko luzera arteko trenekin lan egin ahal izateko. Proiektua idazten ari direla iragarri du gaur Portuak, eta lanek “behin-behinean 3 milioi eurotan baloratu” dituztela iragarri dute. Portu Agintaritzak nabarmendu duenez, lan hauei esker, “portutik atera edo portura datozen merkantzia-trenen luzera ADIFen sareak onartzen duen luzeena izango da”.
Hobekuntza datorren urterako operatibo egotea espero du Portu Agintaritzak. Zehaztu duenez, esportaziorako automobilen konboietan aplikatuko dute lehenik, eta lanak egin ondoren, trenek hamazazpi bagoi izan beharrean, 20 izango dituztela jakinarazi du, Portuaren “efizientzia eta lehiakortasuna” hobetuz.
Portuak dioenez, trenbide loturak “tradizioz bere indarguneetako bat izan dira”, eta hobekuntza lan hauen bidez “etorkizunerako apustua” egiten ari direla adierazi dute, “intermodalitate eta jasangarritasunari” begira.