Euskara ikastaroa jaso dute zortzi merkatari eta ostalarik

Gaur bukatu dituzte bost hilabeteko oinarrizko ikastaroa

2017/06/13

Ezkerretik eskuinera: Lur Mitxelena irakaslea; Itsaso Matas, Geles Barril eta Christian Gonzalez ikasleak.

Euskara merkataritzara proiektuaren beste fase bat bukatu dute gaur. Oiartzungo Udalak eta Ttur-ttur Euskaltzaleon Bilguneak antolatzen duten egitasmo horren barruan, herriko merkatari eta ostalariek euskarazko oinarrizko ikastaroak jasotzen dituzte. Azken honek bost hilabete iraun ditu, eta sektore horietako zortzi langilek hartu dute parte, bi taldetan banatuta (goizekoa eta arratsaldekoa). Alhambra taberna, Itsaso goxokidenda, M2, Zoocenter, Stock Factory, Beti Auro eta +x- establezimenduetako langileek jaso dute ikastaroa, Lur Mitxelena Intxixu-AEK euskaltegiko irakaslearen eskutik. Gaur izan dute ikastaroko azkeneko eskola. Animatzeko deia Mitxelenak azaldu duenez, ikasle guztiek garatu dute entzumena edota idazketa. Hala ere, mintzamenarekin izan dituzte arazo gehien. “Batzuk azken astetan ausartu dira hitz egiten”, gaineratu du. Hori bai, euren artean talde giro polita sortu zela baietsi du. “Beraien artean elkar animatzen zuten”, gaineratu du euskara irakasleak. Geles Barril Mamuteko Stock Factoryko langilea da ikastaroan parte hartu duenetako bat. Lehen aldia du, eta bost hilabeteren ondoren, “seguruago” sentitzen dela ziurtatu du Barrilek. Arraguako Alhambra tabernan Christian Gonzalezek ez du lehen aldia, eta errepikatuko duela iragarri du. “Beti zerbait gehiago ikasten da”, esan du. Euskaraz ez dakiten Oiartzungo merkatari eta ostalariei pauso bera ematera gonbidatu ditu, gainera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.