
Oiartzuarren babesa jaso zuten Atano III.a pilotalekuan.
Oiartzunek eta Azpeitiak Gipuzkoako Herriarteko pilota txapelketaren finala jokatu zuten pasa den larunbatean, Donostian. Arerio gogorregiak izan ziren pilotari azpeitiarrak. Izan ere, aurreko bi txapelak eurek eraman zituzten, eta hirugarrena erreskadan lortu zuten.
Serio aritu ziren azpeitiarrak. Lehenengo partidan, Kadete Mailakoan, erraztasunez aurreratu ziren azpeitiarrak (16-4). Hala ere, Aburuza anaiek aldea murriztea lortu zuten, eta 19-13 jarri ziren. Azkenean, 22-17.
Gazte Mailan, Oroitz Sein eta Ekain Etxeberriak nahi eta ez irabazi behar zuten. Azpeitiarrak, baina, jaun eta jabe izan ziren: partida guztian aurretik joan ziren, eta oiartzuarrak 7 tantotan utzi zituzten.
Ordurako azpeitiarrek Herriartekoa poltsikoan zeukaten. Senior Mailako pilotariak presiorik gabe atera ziren. Markel Etxaniz aurrelari azpeitiarrak erakustaldia eskaini zuen: hamasei tanto bukatu zituen. Salaberria eta Ugaldek osatutako bikotea bost tantotan geratu zen.