Iñaki Zabaleta eta Salamancako danbolinteroak, udako kontzertuan
Herri Musikaren Txokoak udako kontzertua egingo du larunbatean
Ia bi aste dira uda hasi zenetik. Urtaroa aldatzen den bakoitzean bezala, Herri Musikaren Txokoak kontzertua antolatu du. Udakoa datorren larunbatean egingo dute, eta eguraldia lagun izango dutenaren esperoan, kalean egingo dute. Zehazki, Done Eztebe plazan izango dira emanaldiak.
Kontzertu bikoitza izango da datorren larunbatekoa. Salamancatik etorriko dira lehen gonbidatuak. Bertako diputazioko Instituto de las Identidadeseko ikasleak ariko dira, Manuel Perezen danbolinteroaren gidaritzapean.
Bigarren gonbidatua oiartzuarra da. Iñaki Zabaleta igoko da oholtzara, eta bere disko berriena aurkeztuko du. Duela gutxi argitaratu zuen Ibar ixil batean diskoko abestiak kantatuko ditu. Kontzertuak 11:30ean hasiko dira.
Eguna ongi bukatzeko, afaria egingo dute Kontzejupean. Sarrerak Garmendi txokolategian edo Amaxkar tabernan eros daitezke, hamabost euroren truke.
Goizean, dantza tailerra
Kontzertuez gain, egongo da beste jarduerarik. Goizean, Kontzejupean, Salamancako dantzak ikasteko aukera egongo da, arratsaldean kontzertua emango dutenen eskutik. 11:30ean hasiko da ikastaroa.
