[Bideoa eta galeria] "Zaleak zarete saririk onena"

Hibaikako arraunlariak Euskadiko Txapelketako banderarekin heldu dira Errenteria-Oreretara. Harrera beroa egin diete hamarnaka herritarrek eta baita udalak ere.

Ikerne Zarate

Errenteria-Orereta

2017/07/25

Hibaikako arraunlariek Euskadiko txapelketa irabazita harrera beroa jaso dute.

Heldu dira Hibaikako emakumeak eta beraiekin batera ekarri dute Errenteria-Oreretara Euskadiko Txapelketako bandera. Poza, emozioa eta txaloak. Herritarrek bero eta goxo jaso dituzte Hibaikakoak 18:00etan Alabergako biribilgunean eta trikiti doinuek lagunduta egin dute bidea handik Herriko plazara bitartean zaleak jarraituta eta babestuta. Balkoi eta leihoetatik ere txaloka hartu dituzte txapeldunak Gora Hibaika oihu artean. Hibaikako arraunlari Eli Pescadorrek “oso pozik” daudela lorpenarekin esan du: “Azkenean bandera ekarri dugu etxera, eta ez edozein. Hor ibili gara, itsasoa zakar zegoen, baina azkenean geure alde jartzea lortu dugu eta bandera irabaztea”. Udaletxera doan malda igotzen hasi direnean, erraldoi eta buruhandien konpartsa zain zuten Hibaikakoek eta pasiloa eginda heldu dira, Maialen eta Xantiren eskutik, Txapeldunak txapeldunak doinu artean. Herriko plaza lepo, abiatu dira udaletxeko balkoira. Bertan Eli Pescador mintzatu da guztien izenean. Arraunlariak eskerrak eman dizkie herritarrei jarreragatik, babesagatik eta harro esan du: “Bandera lortzea izugarria da, baina zuek, zaleak zarete saririk onena”. Txalo zaparradarekin erantzun diote herritarrek. gaur da madalenetako azken eguna, eta pescadorrek aitortu du ez zutela espero halako harrera jendetsurik izaterik, baina bai, Errenteria-Orereta Hibaikarekin izan da erabat gaur ere. Julen Mendoza banan bana zoriondu ditu arraunlariak pleno aretoan, txanpaina ere zabaldu dute, eta ohorezko agurra ere jaso dute txapeldunek, Jon Mayak dantzatu die. Hunkituta irten dira udaletxeko balkoira eta gogoz astindu dute kostata, eta lan handia eginda, irabazi duten bandera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.