Jon Bautista: «Vila-realen betidanik amestutako unea iritsi zen: Realarekin debuta»
Errenteriarra, joan den maiatzetik, Realeko lehen taldeko jokalaria da. Dagoeneko hiru gol sartu ditu aurrelariak eta lehia zaila izan arren, prest dago minutuak lortu eta golak sartzen jarraitzeko.
Errenteriarra gogor ari da lanean aurtengo denboraldian minutuak eskuratu eta golak sartzen jarraitzeko.
«Realeko jokalari errenteriar bakarra izatea ohore handia da»Gazte hasi zinen orduan Zubietan. Zein izan da zure betiko ametsa? Gazte nintzenetik, alebinetan jokatzen nuenetik, Realeko aurrelaria izan nahi nuela argi nuen. Baldintza ezberdinetan eta postu ezberdinetan jokatzea egokitu zait, baina beti talde honen parte izatea izan da nire helburua. Betidanik, txikitatik, izan dudan ametsa Realeko golegile gorena izatea da. Esan bezala, beste postuetan aritu zara: eskuin hegalean, erdialdean… Nola aldatu zenituen orduko hegaleko korrikaldiak egungo golengatik? Bai, egia da. Postu oso ezberdinetatik pasatu naiz. Touringeko lehen bi denboraldietan erdialdean jokatun nuen, eta Realera joatean hegalera pasatu zidaten. Erdiko atzelari bezala ere partida asko jokatu ditut. Eskuin hegalean jokatzen nuenean pixkanaka zelaian gora joaten hasi nintzen. Orduan, egun Boliviako lehen mailan dagoen eta asko miresten dudan Beñat Sanjosek, aurrelari bezala ipini ninduen. Hark esan zidan etorkizuneko Realeko aurrelaria izan behar nuela. William Jose, Agirretxe, Juanmi… Lehia bizia duzu aurtengo denboraldian. Prest minutuak eskuratu eta golak sartzeko? Bai, noski. Denboraldi hasiera oso ona izaten ari da taldea, eta aurrelariak oso ‘entxufatuak’ daude. Nire naturazko postuan, aurretik William Jose edo Agirretxe bezalako bi jokalari handi ditut, eta argi dut oso zaila dagoela. Entrenamendu, partida eta egun oro Eusebioren konfiantza eskuratzeko buru-belarri arituko naiz. Oso onak direla badakit, baina lan handia eginez gero, euren mailara iristeko ahalmena dudala uste dut. Hala eta guztiz ere, hain kalitate handiko jokalariak aurretik izatea onuragarria da oso, gauza mordoa ikasten delako egunero.
«Gazte nintzenetik, alebinetatik, Realeko aurrelaria izan nahi nuela argi nuen»14 urte ondoren, liderrak zarete lehen mailan. Nolakoa da esperientzia? Urte asko dira Reala lehen mailako lehen postuan ikusten ez dugula, eta bi partidaren ostean gure burua sailkapenean lider ikustea oso pozgarria da. Azken bi urteetan Eusebiorekin egindako lanaren fruitua dela uste dut. Egia esan, egoerak ez gaitu harritzen, gai garelako edozein talderi aurre egiteko. Denboraldiari gol askorekin ekin diogu, eta denak antzeko egoeran jarraitzen badu, ez da arraroa izango lehenengo postuen artean sailkatzea. 2016ko apirilaren 24a, Vila-real. Zer dakarkizu burura egun horrek? Egun horretan betidanik amestutako unea iritsi zen: nire debuta Realeko lehen taldearekin. Egun oso polita, hunkigarria, beti gogoan izango dudan horietakoa. Lehen taldearekin bidaiatuko nuela jakin bezain laster, kuadrillako lagunei idatzi nien. Euren erantzuna berehalakoa izan zen: inongo zalantzarik gabe, niri sostengua emateko prest azaldu ziren. Bi aldiz pentsatu gabe, kotxeetan banatu eta Vila-realera joan ziren. Beraiekin ere, nola ez, nire aita izan zen. Aita nire partida guztietara etortzen da, zale bat gehiago bezala. 89. minutuan, Eusebiok zelaira ateratzeko agindu zidan. Gorputz barrenetik sentsazio arraroa nabaritu nuen, betidanik amestutako unea aurrean nuelako. Minutu gutxi batzuk jokatu arren, partida polita izan zen, ahaztezina. Zer nolako harrera izan zenuen lehen taldearen aldagelan? Dagoeneko urte eta erdi daramat lehen taldeko jokalariekin entrenatzen, eta lehenengo egunetik tratu oso jator eta irekia jaso dut. Gaztea izanda, taldekide guztiengandik hasieratik laguntza asko jaso dut. Egun, beraien txantxen parte naiz [barrez]. Realetik pasatako jokalari askok diote hemengo aldagela bezalako gutxi aurki daitezkeela Lehen Mailan. Etxeko, Zubietatik sortutako jokalari ugari dago, eta denek etxean bezala sentitzeko ahalegina egiten dute, giroa paregabea da.
«Beñat Sanjosek etorkizuneko Realeko aurrelaria izan behar nuela esan zidan»Nola ikusten duzu Errenteria-Oreretako futbolaren egoera? Orereta futbola bizitzen duen udalerria da, zale asko dago. Klub asko daude, zaletasun horren seinale. Onartu behar dut, herrian daudenen artean, nire taldea Touring dela. Egoera onenean ez dagoen arren, etorkizun bikaina opa diet. Herriko kaleetatik jada gazte askok daramate Bautistaren izena Realeko elastikoan. Gazte izatetik, gazteen erreferentzia izatera pasatu zara… Hasieran zirrara handia egin zidan kaleetatik nire kamisetarekin jendea ikustea. Ez da hainbeste denbora pasatu nik neuk Realeko jokalarien izena eramaten nuela nire elastiko txuri-urdinean, eta egun gaztetxoak horrela ikustea ohore handia da niretzat, pozgarria da oso. Orain lanean jarraitu behar dut, herriko gazteen artean erreferentzia izaten jarraitzeko. Gaztetxoei, futbola hainbeste maite duten gazte horiei, kirolaz goza dezatela esan nahiko nieke. Nik Touringen ikasi nuen futbolera jokatzen, betiko lagunen artean. Futbolean maiz esaten den bezala, futbola talde kirola da, ez bakarkakoa. Adiskidetasuna beharrezkoa da futbolean, bai zale eta bai profesional bezala, horrek jokalari bezala hazteko laguntza ematen du. Zeintzuk izan dira zuretzat erreferentziazko aurrelariak? Zalantzarik gabe, gehien miretsi dudan aurrelaria Darko Kovacevic izan da. Nire jokatzeko estilo antzekoa zuen Darkok, errematatzailea. Realetik kanpo Diego Forlan da beste erreferentziazko aurrelaria. Orduak pasatu ditut ordenagailuan jokalari horien golak ikusten. Futboletik at, Jon Bautistak zer nolako zaletasunak ditu? Batez ere kuadrillarekin geratzea dut gustuko. Hondartzara, ibaira edo mendira joateko ohitura handia dugu kuadrillan. Egunerokotasunetik deskonektatzeko baliagarri den edozein plan egiten dugu. Horrez gain, telesailen zalea naiz. Oraintxe bertan, hain famatua den Game of Thrones-ekin ari naiz.
