Haserre, hondakinak biltzeko sistema aldatzeagatik
Lezon, Ondo Ai Gea taldeak deituta, elkarretaratzea egin dute goizean Udalak hondakinen bilketa sistemaren inguruan jarritako azken aldaketengatik. Atez atekoa kendu eta bosgarren edukiontzia izango dute hemendik aurrera.
Lezoko Udalak irailaren 18an aldatuko du hondakinak biltzeko sistema herri osoan. Atez atekoa kendu eta bost edukiontzirekin funtzionatuko dute hemendik aurrera. Lezon Ondo Ai Gea taldeak kezka azaldu du erabakiaren aurrean, gutxiago birziklatzeko eta ingurumena kutsatzeko arriskua ikusten dutelako.
Elkarretaratzea egin dute goizean Lezon, udalak hartutako erabakiak salatu eta haserrea azaltzeko. Honela sentitzeko hainbat arrazoi eman dituzte: “Erabakiak Zubietako erraustegiari bultzada ematen dio eta ez gatoz bat haren funtzionamenduarekin; ondasun eta lehengaiak erretzeaz gain, gipuzkoarren diruaren kolkotik aberastuko dira. Haserre aldaketa honekin Lezok beste inbertsio eta ekintzetarako diru gutxiago izango duelako. Haserre, gai honekin joko politikoa egiten direla pentsatzen dutelako, erabakia herritarrekin hitz egin gabeko hartu dutelako duela bost urte inposaketaz hitz egiten zigutenean. Hondakinen gaiaren inguruan komunikabideek hartu dituzten jarrerengatik. Herritar desberdinen arteko akordioa alderdi boteretsuenetako buruek hankaz gora jartzeagatik”.
Ondo egitea birziklatzea dela azpimarratu dute. Erabakiaren aurrean, herritar guztiak deitu eta animatu nahi dituzte hondakinak ongi bereizi eta dagokion edukiontzira botartzera. Bide batez, auzo-konposta egiten ez duten lezoar guztiak animatzen dituzte horretara. Haiek beren aldetik ingurumena, osasuna eta etorkizunaren alde lanean jarraituko dutela ziurtatu dute. 
