Musika ekoizteko ikastaroa, Errenteria Musikalen eskutik

Tailer berria izateaz gain, hura emateko modua ere hala izango dela azaldu du Jokin Zukuntza zuzendariak, "proiektuetan oinarritutako ikasketa izango da".

Ikerne Zarate Gartziarena

Errenteria-Orereta

2017/09/14

Garazi Lopez Etxezarreta, Asier Lopez Iraola, eta Jokin Sukuntza.

Teknologia berriek egungo gizartean hartu duten garrantziari, eta hainbat ikasleen eskaerei erreparatuta, ikastaro berri eta berritzailea abiatuko du urrian Errenteria Musikalek: Musika ekoizpen tailerra. Tailer berria izateaz gain, hura emateko modua ere hala izango dela azaldu du Jokin Zukuntza zuzendariak, “proiektuetan oinarritutako ikasketa izango da”. Ekoizpen musikala tailerra egiteko ez da musika ikasketa edo ezagupenik behar, ikastaroan bertan jasoko dituzte ikasleek ezagupen horiek. Hartzaileak herritar guztiak dira, baina plazak mugatuak izango direnez, lehentasuna 13 eta 29 urte artekoek izango dute, eta bereziki 13 eta 17 urte arteko gazteek. Lau hilabeteko ikastaroa izango da, urrian hasi eta urtarrilean amaituko dena; eta bigarren tailer bat egingo dute hurrengo urteko otsailean hasita. Ikastaro bakoitzean hiru laguneko hiru talde egingo dituzte eta ordu eta erdiko saioa egingo dute astean. Garazi Lopez Etxezarreta Musika Patronatuko lehendakariak azaldu duenez, “momentuz horrela hasiko gara eta erantzunaren arabera agian handitzea aurreikusiko dugu”. Matrikulak 90 euro balio ditu, eta Errenteria Musikaleko ikasleek hilaren 22ra arte izango dute izena emateko aukera. Ikasle berriek, berriz, hilaren 25etik 29ra arte. Lau proiektu Ikasleek eraman ditzaketen proposamenei zabalik daudela azaldu du bestalde, tailerra gidatuko duen Asier Lopez Iraolak, baina beraiek lau proposamen jarri dituzte mahai gainean: “Rap baten oinarria ekoiztea; DJ saio bat prestatzea; maketa baten grabazioaren gainekoak lantzea; eta azkenik, soinu bandak sortzea”. Push edo MIDI kontrolatzailea erabiliko dute horretarako, ordenagailua eta beste tresna batzuekin batera. Herritar guztiak animatu dituzte ikastaroan parte hartzera, eta bereziki gazteak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.