Miranda Ebroko hilketa matxista salatuko dute bihar

Oiartzungo Mugimendu Feministak egin du deialdia, eta udalak bat egin du

2017/10/04

Astelehenean elkarretaratzea egin zuten, Noelia Noemiren hilketa gaitzesteko.

Miranda Ebron 44 urteko emakume lantarondar baten gorpua aurkitu zuten atzo eguerdian, auto batean sartuta, eta indarkeria arrasto handiekin. Labanarekin egindako zauriak zituen. Bere bikotekide ohia atxilotu zuten Gasteizen, emakumea hiltzea leporatuta. Banatzeko prozesuan sartuta zeuden. Ikertzaileek hasieratik lotu dute indarkeria matxistarekin, eta sekretupean dago kasua. Euskal Herrian egindako zazpigarren hilketa matxista da atzokoa. Hilketa hori salatzeko, Oiartzungo mugimendu feministak elkarretaratzea deitu bihar arratsalderako. 19:30ean bilduko dira, Done Eztebe plazan. Oiartzungo Udalak bat egin du deialdiarekin, eta nazkatuta daudela jakinarazi dute. Azken bi asteak latzak izan direla adierazi dute. “Indarkeria matxistak bere aurpegi guztiak erakutsi ditu: hiru emakumeren hilketak (Melodie Masse Uztaritzen; Noelia Noemi Sestaon, Ana Lantaronen); bortxaketak (Errenterian); genero biolentziarengatik atxiloketak (Bilbo, Zizur Nagusia, Berriobeiti…)”, salatu dute. Eraso eta hilketa horiek guztiak gogor salatzen dituztela berretsi dute, eta oiartzuarrei deia luzatu diete, kalera atera eta mobilizazioetan parte hartzeko. Azaroaren 25a prestatzeko Emakumeen Aurkako Indarkeriaren Kontrako Eguna prestatzeko batzar irekia deitu du Antiju Moreak talde feministak. Oiartzungo feministak gonbidatu dituzte, larunbatean 11:00etan udaletxeko pleno aretoan biltzeko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.