Pasaiako alkate ohi Amaia Agirregabiriari eta Iker Rokandio abokatuari babesa eta elkartasuna adierazteko agerraldia egin dute gaur Pasaiako udal langileek.
Udal langileen batzarraren agerraldia, Agirregabiria eta Rokandiori elkartasuna adierazteko.
Pasaiako udal langileen batzarrak agerraldia egin du gaur Donibanen, Amaia Agirregabiria alkate ohiari eta Iker Rokandio abokatu eta lankide ohiari elkartasuna eta babesa adierazteko. Juanba Berasategi kulturgunean bildu dira, prentsa aurrean adierazteko “isilik geratu nahi ez” duten udal langileak direla.
Langile asko elkartu dira, 110 guztira, askotariko departamentuetakoak, eta komunikatu bat irakurri dute, euskaraz lehenik, eta ondoren gaztelaniaz. Euskara teknikari Jaione Urruzola eta udal informatikari Rafael Puy izan dira bozeramaileak: “Ez gara sindikatuetako ordezkariak, ez eta alderdi politikoetako ordezkariak ere”, adierazi dute. “Gizarte laguntzaileak gara, teknikariak, udaltzainak, kale garbitzaileak, administrariak…”, esan dute, eta deitoratu dute Agirregabiria eta Rokandio kartzelara sartzeko erabakia.
Bi urte eta erdiko kartzela zigorra ezarri diete Agirregabiria eta Rokandiori, eta udal langileek ez dute ulertzen erabakia. “Amaia eta Iker kondenatu dituzte okertu egin zirelako batere ezagutzen ez zuten emakume baten eta bi udaltzainen artean gertaturiko trafiko liskar batean, bitartekari lana egiteko garaian”, zehaztu dute, eta nabarmendu dute gerora beren kabuz salaketa bideratu duten bi udaltzainek eskatuta egin zutela zigorra ekarri dien agiria, “liskarra auzitegietatik ateratzeko helburuz”. Emakumea, isuna ordainduta libre atera da, baina ez alkate ohia eta ordezko lanetan ari zen abokatua: “Baina emakumea isuna ordainduta libre ateratzeko bi udaltzainei auzitegira ez joateko agintzeagatik, bi urte eta erdirako kartzelara sartuko dituzte. Nola da posible? Ez dugu ulertzen”.
“Amesgaiztoa” eta “zentzugabekeria”
Udal langileak sinadura bilketan ari dira, eta Pasaian ere, herritarrek bultzatuta beste bilketa bat ari da egiten; herriko establezimendu askotan egongo da sinadura emateko aukera.
Kartzelara sartzeko erabakiak “amesgaiztoa” dirudien arren, “erreala” dela ohartarazi dute langileek, eta Agirregabiriaren eta Rokandioren profesionaltasuna eta zintzotasuna goraipatuta, hartu dituzten erabakien berri eman dute.
Iragarri dutenez, erresistentzia kaxa bat sortuko dute bi familiak diruz laguntzeko, eta horrez gain, “Amaia eta Iker kartzelara joan ez daitezen eskatzeko antolatzen diren ekimen guztiekin” bat egingo dutela iragarri dute. “Hala ere, zentzugabekeria hori gertatzen bada, ahal dugun guztia egingo dugu lehenbailehen atera daitezen handik”, bukatu dute.
Sinadura bilketan ere ari dira udal langileak, eta gaurko bilkura horretarako baliatu dute.
Prentsaurrekoa bukatuta Amaia Agirregabiriarekin eta Iker Rokandiorekin elkartu dira langileak, han bertan, babesa eta berotasuna agertzeko.
Langileen adierazpena, hitzez hitz
