Hamarnaka lagunek jada hartu dute euskaraz aritzeko konpromisoa.
Abenduaren 3a Euskararen Eguna da. Egun horren bueltarako, kanpaina bat prestatu dute Oiartzungo Udalak, Ttur-tturrek eta beste hainbat oiartzuarrek. Abenduaren 2tik 15era merezi bezala ospatuko dute Euskararen Eguna: hizkuntza erabiliaz.
Konpromisotik aD/Ritzera izena jarri diote.
Kezka batek, baina, bultzatu ditu kanpaina martxan jartzea: euskararen erabileraren atzerakada. Iaz egin zituzten euskararen arnasguneei buruzko tailerrak, eta bertatik dator iniziatiba gauzatzea.
Euskaraz aritzeko edo aditzeko konpromiso aktiboa eskatuko diete oiartzuarrei, aurrez beste hainbat txokotan egin duten bezala (Egia, Lasarte-Oria, Agurain,
Errenteria-Orereta…).
Ahoa eta belarria
Herritarrek bi modutan parte hartzeko aukera izango dute. Alde batetik,
ahobizi izaten. Euskaldunak diren oiartzuarrentzako gonbita luzatu dute: lagun arteko elkarrizketak euskaraz izatea animatu nahi dituzte, eta ezezagun direnekin lehenengo hitza euskaraz egitea.
Beste modua
belarriprest da. Euskara ulertzen duten herritarrei dago zuzenduta: elkarrizketak elebidunak izaten ahaleginduko dira, euskalduna erdaraz aritzera behartu gabe. Euskaraz dakitena praktikan jartzea animatu dituzte, halaber.
Kanpainan parte hartzen duen bakoitzak, Onintza Etxebeste artistak diseinatutako txapak eramango ditu, bakoitzak jokatuko duen papera identifikatuko duena.
Parte hartu nahi duten oiartzuarrek galdetegi bat bete beharko dute.
Oiartzuarrak Ga-ren webgunean bete daiteke, edo udaletxean edo ikastetxeetan orrialdea entregatuta. Gainera, azaroaren 14, 15, 17, 23 eta 24an izena emateko mahaia jarriko dute Fermiñenen. Egun horietan jaso ahal izango dira txapak.
Hitzaldiak, motorrak berotzeko
Kanpaina ez da abendura mugatuko. Azarorako hiru hitzaldi antolatu dituzte. Honakoak izango dira:
- Azaroak 8: Euskaldunen hizkuntz eskubideak eta jokabideak. Hizlariak: Garbiñe Petriati eta Estitxu Eizagirre.
- Azaroak 16: Euskara eta feminismoa bidaide. Hizlariak: Lorea Agirre eta Idurre Eskisabel.
- Azaroak 22: Lutxo Egia eta Pako Aristi idazleen arteko solasaldia.
Horrez gain, azaroaren 25ean TELP ikastaroa (
norbanakoaren hizkuntzarekiko jarrera) egingo dute. Helburua da euskaraz aritu nahi denean sortzen diren egoera deserosoetan naturaltasunez eta eroso jokatzeko tresnak ematea. Goiz osoko saioa izango da (09:00etatik 13:30era), udaletxeko areto nagusian, EMUNeko teknikariek gidatuko dutena.
Hogei laguneko kopuru mugatua izango du ikastaroak, eta aldez aurretik eman beharko da izena, azaroaren 22ra arte.
Internet bidez eman daiteke izena, edo e-posta bitartez (
Euskara Saila,
kanpainaren helbidea edo
Ttur-tturren e-posta).
Euskararekiko konpromisoa festa izan dadin, abenduaren 2an Abaraxka ludotekan II. Euskara Maratoia egingo dute. Horrez gain, abenduaren 15ean, world cafe saio bat egingo dute, kanpainan zehar emandakoak partekatzeko.
