Donibanen lehenbizikoz ospatuko dute Gau Beltza
Kalabazak hustu eta haurrak makillatuko dituzte.
Beste hainbat tokitan bezala Donibanen ere ari dira ohitura zaharrak berreskuratzeko ahaleginean, eta biharko, helburu horri jarraituta tailer eta solasaldi interesgarri bat antolatu dute Bibliotekaren Lagunek: barrutiko aiton-amonak eta ludotekako haurrak elkartuko dituzte liburutegi berrian, eta han adinekoak beren haurtzaroan Santu Guztien Bezpera nola ospatzen zuten kontatuko diete barrutiko txikienei.
Ondoren, garai batean egin antzera kalabazak hustu, argiztatu eta haurrak makilatuko dituzte Gau Beltza ospatzeko. 18:30ean da tailerra.
Colm Ó Ceallacháin-i harrera
Tailerra bukatuta, 19:00etan, Hugoenean lanean ari den idazle irlandarrari harrera egiteko kafe tertulia antolatu dute, eta Haloween festak jatorri zelta duenez harekin ere hitz egingo dute gaiaz.
Horrez gain, Pasaian zertan diharduen azalduko du Colm Ó Ceallacháin-ek. Idazlea delako ez ezik, 2013an Irlanda igerian inguratu zuelako da ezaguna. Lanbidez hezitzailea da eta gazteekin lan egiten du.
San Pedron baita ere
Donibanen soilik ez. San Pedron ere ospatuko dute bihar Gau Beltza, han Proisako Haur eta Familien Txokoak eta jai batzordeak elkarlanean antolatuta. Hementxe egitaraua.
