Oiartzunen ondarea, zure mahaian

'Paeta zaharrak erantzun' mahai jokoa aurkeztu dute; Oiartzuni buruzko 1.500 galdera batzen ditu

2017/10/31

Aintzane Lertxundi (lehen planoan) eta Aintzane Toledo, jokoari buruzko azalpenak ematen.

Atzo arratsaldean aurkeztu zuten Paeta zaharrak erantzun mahai jokoa. Oiartzungo historiari, istorioei eta hizkerari buruzko mahai jokoa da, trivial-aren antzekoa. Ttur-tturrek eta Oiartzungo Udalak sustatu dute jokoa. Oiartzuarren baitan egitasmoaren fruituetako bat da. Oiartzuarren hainbat lekukotza jasotzen hasi ziren, eta mahai jokoa bildutako ondarea dibulgatzeko modu dibertigarria izan daitekeela pentsatu zuten. 1.500 galdera ditu mahai jokoak, sei gaitan banatuta, bakoitza bere kolorearekin: historia; baserria/natura/ekonomia; geografia/toponimia; gizartea/kirola; hizkera; eta kultura. Ttur-ttur Euskaltzaleon Bilguneko Aintzane Lertxundi eta Aintzane Toledo aritu dira lanean, eta oiartzuar ugarik osatu dute galdera eta erantzunak kontrastatzeko taldea. Tartean zen Iñaki Arbelaitz Gelbentzu zena. Atzoko ekitaldian mahai jokoaren ale bat oparitu zioten alargunari, txalo artean. Ez zen oparia jaso zuen bakarra izan: Ane Lardik —Oiartzuarren baitan egitasmoa hasi zuena— eta Maria Jesus Enbilek —galdera eta erantzunetan egin duen ekarpenagatik—. Dixidu Diseinu Grafikoak diseinatu du jokoa, eta Iosu Mitxelenak egin du azaleko ilustrazioa. Eskuratzeko bidea Paeta zaharrak erantzun jokoa eskuratzeko hainbat mota daude. Alde batetik, Internet bidez enkargatuta. Oiartzuarren baitan-en webgunean sartu beharko da horretarako. Bestetik, Haurtzaro Ikastolan, Elizalde Herri Eskolan, Urrats liburudendan edo Ttur-tturren bertan (Fermiñenen, 08:00etatik 12:30era) egin daiteke eskaera. Hogei euroko prezioa du du.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.