[Galeria] Ez dute pobreziara kondenatuta bizi nahi

Azken sei urtean pentsiodunek erosteko ahalmena etengabe galtzen ari direla esan du Duintasunak, "bataz beste %6,5 galdu dugu".

Ikerne Zarate Gartziarena

Errenteria-Orereta

2017/11/06

Duintasunak kalea hartu gaur berriz ere.

Ilun. Hala ikusten dute etorkizuna, jasotzen dituzten “miseriazko” pentsioen eta ezarritako murrizketen ondorioz. Horri aurre egiteko bidea zein den argi dute, eta hilabeteko lehen astelehenero egin ohi duten moduan, gaur ere, kalera irten dira hamarnaka pentsiodun Duintasunaren deialdiarekin bat eginda. Pentsioak berreskuratzeko garaia dela aldarrikatu dute, pentsio duinak, 1.080 euro edo hortik gorakoak eskatu dituzte, baita babes eta Gizarte Segurantza propio eta publikoa. Azken sei urtean pentsiodunek erosteko ahalmena etengabe galtzen ari direla esan du Duintasunak, “bataz beste %6,5 galdu dugu. Pentsioak izoztuta, askorentzat ezinezkoa da egunerokoari aurre egitea. Bazterketa eta pobreziara kondenatzen gaituzte. Miseriazko pentsioak indarkeria mota bat ere badira”. Eskaera zehatzak bai, baina salaketarako tartea ere hartu du jubilatu eta pentsiodunen elkarteak. Besteak beste, iruzur fiskala aipatu dute, “enpresa gehienek dagokiena baino gutxiago ordaintzeko sozietateen gaineko zergan, galerak edo 6.000 eurotik beherako irabaziak aitortzen dituzte. Presio fiskal txikia, Europako Batasuneko txikiena ezartzen zaie, gainera”. Elkarretaratzea amaituta, manifestazioa egin dute Herriko plazatik abiatuta herrian barrena. Oihu nagusiak murrizketen kontrakoak, baina baita “lapurren” kontrakoak ere: “Ez da dirua falta, lapurrak daude soberan”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.