Obrek hiru hilabeteko iraupena izango dute; udalak eta aldundiak finantzatuko dituzte, erdibana
![madalensoro obrak](http://oarsoaldea.hitza.eus/site/files/2017/11/madalensoro-obrak.jpg)
Datorren urteko otsailera arte iraungo dute obrek. Fatxada berrituko dute, besteak beste.
Madalensoro pilotalekua berritzeko lanak hasi dituzte. 1979an eraiki zuten frontoia, eta orduan legez kontuan hartu behar ez ziren moldaketa batzuk egingo dituzte, baita zaharkituta geratu diren hainbat azpiegitura ere.
Oiartzungo Udalak jakinarazi duenez, lanek hiru hilabete iraungo dute, datorren urteko otsailera arte. Fatxada berrituko dute, eta aldagelak mugikortasuna murriztuta dutenentzako egokituko dituzte. Gainera, igogailua jarriko dute, eta instalazio elektrikoa zaharberritzea ere aurreikusi dute.
Obraren finantzazioa udalak eta Gipuzkoako Foru Aldundiak egingo dute, erdibana. Bakoitzak 397.060 euro jarriko ditu.
Orain dela hilabete irudikatu zuten hitzarmenaren sinatzea, pilotalekuan bertan.
Kantxaren erabiltzaileei ahalik eta kalte gutxien eragitea dute helburu. Udalak adierazi duenez, Oiarpe, Txost eta ESAITekin elkarlanean ari dira, plangintza osatzeko.