Urtero bezala, udala eta auzotarrak bilduko dira; datorren urteko aurrekontuak eta auzoen egoera aztertuko dituzte
Udal Gobernu Taldeak auzo batzarretan parte hartzera gonbidatu ditu herritarrak.
Oiartzungo Udalak, urtero, herriko zortzi auzoetako bizilagunekin batzarrak egiten ditu. Aurten ere hala izango da; 2017ko auzo batzarrak hilaren 20an hasiko dira.
Zortzi batzarretan 2018ko aurrekontuak azalduko dituzte, eta udalaren beraren egoeraren balorazioa ere emango dute. Horrez gain, tokian tokiko egoera errepasatuko dute, eta auzotarren eskutik beharrak jasoko dituzte, baita lehentasunak markatu ere.
Udal gobernu taldeak auzotarrak gonbidatu ditu, bertan parte har dezaten. Auzo batzar horiek duten garrantzia nabarmendu du gobernu taldeak: “Batzar hauetan gaiak, kezkak eta eskaerak zuzenean jaso eta auzotarren artean iritziak trukatzen direnez, Udalarentzako oso adierazle onak izaten dira herritarren kezkak eta beharrak baloratzeko eta horiek bideratzeko”.
Aurrekontuak onartu aurretik egiten dira batzar horiek, eta horregatik, auzo bakoitzak dituen beharrei leku egiten diete. “Azken urtetan auzoetan bideratu diren hobekuntzak auzo batzar hauetan partekatutakotik etorri dira”, gaineratu du udal gobernu taldeak.
Eguteria
- Altzibar: Hilak 22, asteazkena (eskolan, 19:30ean).
- Arragua: Hilak 20, astelehena (elizako lokalean, 19:30ean).
- Elizalde: Hilak 28, asteartea (Manuel Lekuona bibliotekan, 19:30ean).
- Ergoien: Hilak 22, asteazkena (Auzokalte elkartean, 19:30ean).
- Gurutze: Hilak 28, asteartea (Bizardia elkartean, 19:30ean).
- Iturriotz: Hilak 20, astelehena (auzo lokalean, 19:30ean).
- Karrika: Hilak 23, osteguna (Artaso elkartean, 19:30ean).
- Ugaldetxo: Hilak 23, osteguna (Atamitxen, 19:30ean).
