Buru gaixotasunei buruzko tailerrak egingo dituzte ikastetxeetan
Arraztalo eta Aldura elkarteek antolatu dituzte tailerrak; lehena Elizalde Herri Ikastetxean egingo dute, ostegunean
Oiartzungo Arraztalo elkarteak eta Errenteria-Oreretako Aldurak gaixotasun mentalei buruzko tailerrak egingo dituzte. Iaz herriz herri egin zituzten, eta herritarrek buru osasunari eta gaixotasun psikikoei buruz duten ikuspuntua bildu nahi zuten.
Aurten ikastetxeetan egingo dituzte tailer horiek. Jakinarazi dutenez, helburu berbera izango du, alegia, eskola komunitateetako partaideekin gaixotasun psikikoa duten pertsonen egoera eta problematika aztertzea.
“Haur eta gazteen artean egiten den prebentzioak izugarrizko garrantzia du ondoren ager litezkeen buru-osasun arazoak ekidin ahal izateko. Horregatik, sentsibilizazio ekintza honen helburua gaixotasun psikikoaren gaia eskoletan lantzen hastea izango da”, esan dute Aldura eta Arraztalok. Tailerrak egiteaz gain, Lehen Hezkuntzako bosgarren eta seigarren mailetako ikasleen artean unitate didaktikoa banatuko dute.
Tailerren formatua parte hartzailea izango da. Horrela, hainbat ariketaren bitartez, gaixotasun psikikoa duten pertsonen eguneroko zailtasunak aurkeztuko dizkiete. Tailerrak eskola komunitatera egokituta egongo direla iragarri dute, eta ikasle, guraso eta irakasleak gonbidatu dituzte, bertan parte har dezaten.
Lehenengo tailerra Elizalde Herri Eskolan izango da, datorren ostegunean, hilak 16. Ikastetxeko mediatekan jarri dute zita, 16:45ean. Tailerrak hezkuntza zentroetan izan arren, herritar guztiei dago zabalik.
‘Zein kolore du buru gaixotasunak?’ da tailer zikloaren leloa.
