‘Martxan’ dokumentaleko fotograma bat.
Emakumeen Kontrako Indarkeriaren Aurkako Nazioarteko Eguna da bihar. Horren harira, Oiartzungo Feministen Asanbladak —Antiju Morik, Abaraxkak, Ernaik, Ikasle Abertzaleek, Kuadrillategik, udalak eta norbanakoek osatzen dute— hainbat ekitaldi antolatu ditu.
Lehenengoa pasa den larunbatean egin zuten. Bertsoa eta bakarrizketa uztartzen dituen Erradikalak gara emankizuna eskaini zuten. Gaur eta biharko beste hiru zita jarri dituzte.
Gaur, 19:00etatik aurrera,
Martxan dokumentala emango dute, udaletxeko pleno aretoan. Guatemala, El Salvador eta Euskal Herriko zortzi emakumeren testigantzak jaso dituzte bertan. Ondoren, solasean aritzeko txanda izango da.
Biharko, berriz, hitzordu bikoitza jarri dute. Alde batetik, mural bat margotuko dute Done Eztebe plazan. 16:30ean geratu dira horretarako. 19:00etan, herriko hainbat artistek ondutako
Badabil zerbatte emanaldia eskainiko dute, pleno aretoan. Idoia Beratarbidek, Lur Gaztelumendik, Goiatz Labandibarrek, Ainara Lasak, Alaia Martinek, Iraitz Mateok, Olarri Dantza Taldeak eta antzerki taldeak hartuko dute parte.
Ludotekan ere bai
Abaraxka udal ludoteka feministen asanbladan parte hartzen duen eragileetako bat da, eta eurek ere beren ekarpen propioa egingo dute. Bihar, 16:30etik hasita, saioa egingo dute. Tratu onaren txokoa izendatuko dute ludoteka. Gainera, eskuplast eta eskulanetan ere ariko dira.
