Merkatari eta ostalarientzako euskara ikastaroak, beste urte batez

Abenduaren 13ra arte eman dezakete izena; ohi bezala, oinarrizko ikastaroa eta aurreratua eskainiko dituzte

2017/11/30

Iazko ikastaro bateko irudia.

Beste urte batez, Oiartzungo merkatari eta ostalariek euskara eskolak jasotzeko aukera izango dute. Oiartzungo Udalak eta Ttur-ttur Euskaltzaleon Bilguneak indarrean duten hitzarmenari esker izango da, aurten ere. Horrela, 60na orduko iraupena izango dute oinarrizko mailako eskolek zein aurreratukoek. Lehenengoen kasuan, bezeroekin oinarrizko elkarrizketak izatea da helburua. Maila aurreratua aukeratzen dutenek, berriz, euskara pixka bat ulertzen dutenak izango dira, eta xedea ezagutzan sakontzea eta hitz egiten trebatzea izango da. Intxixu-AEK euskaltegiko irakasleak izango dira eskolak emateko ardura izango dutenak. Euskara eskolak Mamuten emango dituzte, Oarsoaldea Garapen Agentziaren bulegoetan. Berritasun bezala, enpresa bertan taldetxoak sortuz gero, lantokian emango dituzte euskara eskolak.

Izen ematea eta Lanin

Abenduaren 13ra arte eman daiteke izena, eta ikastaroak 100 euroko prezioa izango du. Hala ere, asistentzia kopuru bat betez gero, Oiartzungo Udalak kostuaren %70 hartuko du bere gain. Horrez gain, HABEren hizkuntza ziurtagiriak lortzeko aukera izango dute. Izena eman nahi dutenek, Ttur-tturera jo dezakete (Fermiñene eraikineko bigarren solairuan). Bestela, bertara deitu (943 26 01 82) edo e-posta bidez idatz dezakete. Bada bestelako berritasunik: Lanin egitasmoan parte hartzen ari diren enpresetako langileek parte har dezakete, merkatari eta ostalarien baldintza berberetan. Izena emateko epeak eta tokiak berberak dira, eta taldea osatuz gero, enpresan bertan jasoko lituzkete eskolak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.