Merkataritza txikia eta euskarazko prentsa, eskutik

Berrialagun diren komertzioetan erosiz gero, 1.000 euroren zozketan parte hartuko dute, gaur sinatutako akordioaren arabera

Erik Gartzia Egaña

Oiartzun

2017/11/30

Itturriko Ion Zabaleku; udaleko Jexux Leonet eta Eneritz Arbelaitz; eta Martxelo Otamendi, Berriako zuzendaria.

Pasa den asteartean ikusi zen bezala, erosketak euskaraz egiteak saria dauka. Abenduan, berriz, euskarazko prentsa babesten duten establezimenduetan erosteak izango du saria. Izan ere, Berria Taldeak, Itturri merkatarien elkarteak eta Oiartzungo Udalak kanpaina bat abiarazi dute gaur. Euskarazko prentsa babesteaz gain, merkataritza txikia ere sustatuko dela nabarmendu du udalak. Horregatik lagunduko dute ekonomikoki. Berria Taldeak harpidetza kanpaina bat egina du herriko komertzioetan. 30tik gora berrialagun lortu dituzte, eta komertzio eta ostalaritza establezimendu horietan erosiz gero, erosketa bonoen zozketan sartuko dira bezeroak. Bost, hamar eta 50 euroko bonoak izango dira, eta guztira, 1.000 euro banatuko dituzte saritan. Gainera, Berrialagun egin diren komertzioen artean, beste 1.000 euro banatuko dituzte, egunkarian publizitatea jartzeko. Kanpainak abenduaren 15era arte iraungo du, eta hurrengo egunean —Txerri Eguna— egingo dute zozketa.

Txikien arteko elkarlana

Akordioaren sinaduran izan da Martxelo Otamendi, Berria egunkariko zuzendaria. “Euskarazko prentsa iristen ez den herritarrengana heltzen lagunduko digu”, esan du. Gainera, “Berria bezain txikia” direnekin lan egiteko asmoa izan dute hasieratik, elkarri laguntzeko. Jexux Leonet alkateak, bere aldetik, esan du udalarentzako garrantzitsuak diren bi lan ildo barnebiltzen dituela kanpainak: merkataritza txikia eta euskalgintza. Bi esparru horietan aritzen direnen konpromisoa aitortu du Leonetek. Itturri merkataritza elkarteko lehendakari Ion Zabalekuren ustez, zozkatuko diren sariek herritarrengana hurbiltzeko aukera ematen dute, eta elkarlana txalotu du. Gainera, udalari eskerrak eman dizkio merkataritza txikia sustatzeko ematen ari den urratsengatik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.