[Galeria] Txerria, behintzat, ez da busti

2017ko Txerri Eguna ospatu dute gaur goizean, Oiartzunen; ganadu eta artisauen feria egin dute Madalensoro pilotalekuan

2017/12/16

Txerri Egunak Madalensoro izan du erreferentzia puntua.

Txerri Eguna 2017 ospatu dute gaur Oiartzunen. Udazkeneko azkeneko asteburua da hau, eta udazkenari legez dagokion eguraldia egin du: hotz handirik ez, baina euria bota du. Momentu batzuetan, baina, euriak eguzkiari menia eskaini dio eta izpi batzuek, momentu batzuetan, goxatu dute goiza. Meteorologiaren gorabeherak alde batean utzita, jende ugari hurbildu da Madalensoro ingurura, han antolatutakoarekin gozatzera. Kanpoan, ganadu feria. Hori bai, txerriarentzat —bera da eguneko protagonista— toki pribilegiatuena utzi diote: frontoiko estalpea. Barruan, berriz, artisauen feria egin dute. Askotariko produktuak saldu dituzte, etxean egindakoko eztitik hasi, eta eskuz egindako jostailuetaraino, beste hainbat produkturen artean. Jendetza bildu da pilotalekuko kantxan, batzuek propio joanda, beste batzuek aterpe bila. Kontuak kontu, artisauek eskertuko zuten euria egin izana. Horrez gain, herriko bi ikastetxeetako dantza taldeek ere emanaldiak eskaini dituzte. Bestalde, Berrialagun diren komertzioetan erosketak egin dituztenen artean zozketa egin dute. Errenteria-Oreretara joan da sari potoloa: Sergio Santamariak eraman ditu 1.000 euroak. Horrez gain, Berrialagun diren saltoki edo tabernen artean beste mila euro zozkatu dituzte, publizitatean xahutzeko. Garmendi txokolategiaren izena zeraman papera atera dute. Ekitaldi ofizialak bukatu diren arren, eta poltsikoak beteago edo hutsagoak edukita, ziur festak arratsaldean jarraituko duela, modu batera edo bestera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.