Etapa berri baten hasieran daudela ziurtatu du Haurtzaro Ikastolak
50. urteurreneko ospakizunak atzean utzita, etorkizunari begira jarri dira; zuzendaritza taldea aldatu dute
Zuzendaritza talde berriko kideak.
Aldaketak
Batzar nagusian hainbat aldaketa eman ziren. Hala, zuzendaritza talde berria atera da bertatik. Aritz Gonzalez izango da zuzendaria, eta Argiñe Oiarbide, Roxali Otegi eta Xabier Salaberria izango dira ikasketa buruak. Kontseilu Errektorean parte hartzen zuten gurasoen ordezkoak ere hautatu dituzte. Horrez gain, Iñaki Irastorza lehendakari ohia eta orain arte kontseilukide izandakoari eskerrak eman dizkio presidenteak, baita ere hamabi urtez zuzendari izan den Sorkunde Lekuonari ere.Eredu propioaren aldarri
Bergaretxek ikastolen ereduaren baliogarritasuna aldarrikatu zuen: “Besteena gutxietsi gabe, gure eredu horretan sinestu eta aurrera eraman behar dugu. Hor dugu Haur Hezkuntzako proiektu berria, KIVA ikastola gara, bizikidetzan lanean etengabe ari gara, EKI ere Lhehenengo Hezkuntzan zabaltzen ari gara…; bi hitzetan, etengabe proiektu berriak aztertzen, martxan jartzen eta hobetzen ari den hezkuntza eredua gara ikastolak”, gaineratu zuen Bergaretxek. Gaineratu zuenez, ikastolak publikoak dira, ez daudelako Frantziako edo Espainiako estatuen administrazioen menpe: “Ikastolok ez dugu Espainia eta Frantzia eredu publiko zaharkitu eta atzerakoien sinisten. Ikastolok bultzatzen dugun eredu publikoak, besteak beste, Holandan, Finlandian eta Danimarkan urte asko daramatza martxan”. Beste hainbat gai jorratu zituzten: pasa den ikasturteko kudeaketa txostena, eta aurtengo kudeaketa planaren onarpena; iazko kontu ekonomikoak eta aurtengo aurrekontua; Haur Hezkuntzako marki berria; Bianditz SL; udalarekin eta Elizalde Herri Eskolarekin harremanak eta 50. urteurreneko ospakizunak. Hezkuntza arloari lotutako hainbat gai ere aztertu zituzten.
