Jesus Mari Zamorak 'etxean' aurkeztuko du bere biografia

Aingeru Espinosak idatzi duen 'Zamora y la Real Sociedad' liburua aurkeztuko dute ostiralean, Xenpelar Etxean

2017/12/19

Aingeru Espinosa, Jesus Mari Zamora eta Iñaki de Mujika, ekaineko aurkezpenean.

Futbolean, etxean jokatzeak plus bat ematen du, zaleen babesa jasotzen delako eta puntuak irabaztea errazagoa izan ohi delako. Jesus Mari Zamorak (Errenteria-Orereta, 1955) aspaldi utzi zion futbolean jokatzeari, baina etxean ariko da datorren ostiralean. Izan ere, bere biografia herrikideen artean aurkeztuko du. Aingeru Espinosak idatzi du Jesus Mari Zamora y la Real Sociedad. Cantera y sentimiento liburua, eta Naveus argitaletxearekin argitaratu dute 2017 honen erdialdean. Ekainean egin zuten lehenengo aurkezpena, Don Bosco ikastetxean, Zamora han hasi baitzen futbolean jokatzen. Orain, bere herrikideen —baita hurbildu nahi dutenen— artean emango du liburuaren berri. Izenburuan bere izena jartzen badu ere, 1970eko eta 1980eko Realaren historia jaso du Espinosak. Hazten eta eraldatzen ari zen kluba zen Reala, baina baita gizarte bera ere. Horregatik, liburuan ez da futbolari buruz bakarrik hitz egiten; garaiko egoera sozial eta politikoa, besteak beste, agertzen delako, jokalari ohiaren ikuspuntutik. Errenteria-Oreretak eman duen inoizko futbol jokalaririk onenak Xixonen sartu zuen gol hura iltzatuta geratu zen milaka euskal herritarren artean —txuri-urdinak izan ala ez—. Orain, bere memoriak betikotuta geratuko dira, liburu baten orrialdeetan; Futbola, futbola da esaldia bere horretan hutsala dela erakusten dute. Ekitaldia Xenpelar Etxean izango da, datorren ostiralean (hilak 22), 19:00etatik aurrera. Sarrera doan izango da, toki guztiak bete arte. Etxean bezala jokatzea bezalakorik ez dagoelako.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.