Oiartzungo Udalak ia 17 milioiko aurrekontua izango du

2017tik %1,3 igo da aurrekontua; herritarrekin eta oposizioarekin landu dituzte

2018/01/04

Oiartzungo Udalak ia hamazazpi milioi euroko aurrekontua izango du.

Oiartzungo Udalak baditu bere behin betiko aurrekontuak. 16.745.405 euroko kopurua izango dute 2018an, iaz baino %1,3 gehiago. Herritarrei eskaintzen zerbitzuak bermatu nahi dituzte, baita ekipamenduak eta azpiegiturak sortu eta hobetzea ere. Udalaren egoera ekonomikoa normala dela berretsi dute. Gogorarazi dutenez, urrian hasi zuten aurrekontuak osatzeko bidea. Hala, auzo batzarrak egin zituzten, 143 herritarren ekarpenak jasoz, eta oposizioarekin —EAJrekin— ere bildu dira. Topaketa horren emaitza direla nabarmendu dute.

Bi helburuak

Herritarren ongizatea bermatzea da udalaren helburu nagusietako bat. “Orain arteko gizarte politikak mantendu eta indartuko dira, etxez etxeko zerbitzua, esaterako. Gizarte Zerbitzuak hobetzeko egitasmoa ere badugu eskuartean”, zehaztu dute. Horrez gain, sail berri bat sortu du Oiartzungo Udalak: Berdintasunarena. Dagokion baliabide pertsonal eta ekonomikoa eman diote. Orain arte, Gizarte-Ongizate sailetik landu dituzte politika feministak, baina gaiaren garrantzia dela eta, arloak sail propioa izango du.

Mendiburu 14 eta Arizmendi-enea

Beste lan ildo garrantzitsuenetako bat azpiegitura eta ekipamenduak izango dira. Hirigintzako inbertsioetara 2.304.000 euro bideratuko dituzte. Horren erdia udal eraikinen bi proiektutara zuzenduko dituzte, Arizmendi-eneara eta Mendiburu 14ra. Horrez gain, mantenu lanek izango dute garrantzia arlo horretan. Lan horien barruan bilduko dira honako aspektuak: auzoetako beharrak bideratu; poligonoen biziberritzea; ur-hoditeria berritzen jarraitu; argiteria sarea berritu iraunkortasun energetikoa lortzeko; herribideak konpondu; garraio publiko zerbitzuak (Xorrola eta taxibusa) sustatu, eta abar. Gainera, Altzibar eta Karrika arteko bidegorri proiektua gauzatuko dute 2018an.

Herriko eragileekin lanean

Oiartzungo Udalak jakinarazi duenez, Euskara, Kirola, Gazteria eta Kultura sailek pisua izango dute 2018an. Esparru horietan lan egiten duten herriko eragileekin elkarlanean jarraituko dutela iragarri dute. Hainbat adibide zerrendatu dituzte: Konpromisotik aD/Ritzera; kirol elkarteentzako diru laguntzak; gazteek sustatutako egitasmoak babesteko laguntzak; Beloaga gaztelua berreskuratzea, eta abar. Agintaldi honetan martxan jarritako egitasmoek ere izango dute beren tartea: Etxebizitza Bulegoa; lehenengo sektorea bultzatzeko Lurbizi plana; mendiak garbitzeko Larre Plana eta komertzio txikia sustatzeko plana.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.