Allerru KEren gizonen taldeak Mariño jasoko du bihar Plazetan, eta Munttarpek Egiari egingo dio aurre, bihar ere, Bekoerrotan.
Allerruk lidergoa du helburu.
Gabonetako etenaldiaren ondoren, kirol liga guztiak martxan izango dira asteburuan. Lezoko bi taldek euren ligetako lidergoan jartzeko aukera izango dute, irabazten badute, eta egun lider direnek huts egiten badute. Gizonenak dira talde horiek, Allerrurena eta Munttarperena.
Allerruk etxean jasoko du bihar (larunbata), 16:00etan, Irungo Mariño. Erregional Preferenteko bigarren dira lezoarrak, aurretik Deusto-Donostia dutela bi puntura (donostiarrek 34 puntu, Allerruk 32). Biharko kontrarioa, Mariño, sailkapenaren erdialdetik behera dago, hortaz, irabazteko moduko partida da. Deusto-Donostiak, ordea, hirugarren den taldearen zelaian jokatuko du, EAS08ren etxean. Hortaz, egungo liderren partida konplikatua da, eta hortik etekina jaso dezakete lezoarrek, baldin eta etxeko lanak egiten badituzte.
Eskubaloian, Gipuzkoako Bigarren Mailako lidergoa konpartitzen ari da Munttarperen gizonen taldea, Elgoibarrekin. 14na puntu dituzte biek. Etxean jokatuko dute berdeek (bihar, 18:00etan) laugarren den Egiaren kontra. Ez da partida erraza izango, baina irabazteko modukoa da. Alta, Elgoibarrek sailkapenaren behealdean den Bergararen etxean jokatuko du, eta zaila badirudi ere, sorpresaren bat izatekotan lezoarrek baliatu beharko lukete sailkapenaren buruan bakarrik jartzeko.
Areto futbolean, gaur, derbia. Bekoerrotak 21:40an jasoko du Gaintxu AFTren eta Oreretako Ostiko taldearen arteko eskualdeko norgehiagoka. Jokoa eta giroa ziurtatuta daude.
Honakoa da asteburuko agenda osoa, Lezoko kirol talde nagusiena.
FUTBOLA
Gizonen Erregional Preferentea
- Allerru-Mariño, bihar (larunbata) 16:00etan Plazetan.
Emakumeen Erregionala, Kopa
- Axular-Allerru, etzi (igandea) 15:00etan Donostiako Puion.
Gizonen Gazteen Lehen Maila, Igoera Fasea
- Allerru A-Urnieta, bihar (larunbata) 18:00etan Plazetan.
Gizonen Gazteen Lehen Maila, Kopa
ESKUBALOIA
Emakumeen Euskal Liga, Bigarren Maila
- Munttarpe-Irauli Bosteko, bihar (larunbata) 16:00etan Bekoerrotan.
Gizonen Gipuzkoako Liga, Bigarren Maila
- Munttarpe-Egia, bihar (larunbata) 18:00etan Bekoerrotan.
ARETO FUTBOLA
Gizonen Gipuzkoako Lehen Maila
- Euskalduna-Jaixki AFT, etzi (igandea) 11:30ean Andoaingo Allurralde kiroldegian.
Gizonen Gipuzkoako Bigarren Maila
- Gaintxu AFT-Ostiko Sindikato, gaur (ostirala) 21:40an Bekoerrota kiroldegian.
SASKIBALOIA
Gizonen Gipuzkoako Hirugarren Maila
- Antigua Luberri-Kurkubi SBT, bihar (larunbata) 18:00etan Donostiako Benta Berriko kiroldegian.
