Kanta sortzen duen herri bat ez da inoiz hilko

Haziak proiektuak antolatuta, Oiartzunentzako abesti bat sortuko dute; lehen saioa datorren asteazkenean izango da

2018/01/26

Haziak egitasmoak Abaraxka ludotekan egingo du tailerra.

Haur eta helduen arteko dinamikak sustatzen ari da, azken aldian, Haziak proiektua. Hezkuntza formala eta ez-formalaren arteko zubi lanak egiten dituzte, eta datorren asterako zita berri bat jarri dute. Oiartzunentzako kanta berri bat sortu nahi dute, eta lehendabizi letra osatuko dute. Sei urtetik gorako haur eta gaztetxoei dei egin diete, Abaraxka ludotekara hurbil daitezen. Bertan sortuko dute abestiaren letra, hezkuntza ez-formal baten testuinguruan. Jon Martin bertsolaria ariko da dinamizatzaile lanetan. Saioa 17:30ean hasiko da. Haziak proiektuko Nora Barrosok azaldu duenez, gero etorriko dira doinua eta konponketak. Horren ardura Ibargain Musika Eskolakoek eta Herri Musikaren Txokokoek izango dute. “Irakasle eta ikasleek egingo dute ekarpena. Haurren parte hartzea ere bermatuko dugu hor; ez diegu beren tokia kendu nahi”, jarraitu du Barrosok. Elkarlanaren emaitza —abestia, alegia— herrian sozializatuko dutela iragarri du.

Herriari ekarpena

Abestia Oiartzunentzako ekarpena izango da, herri proiektua baita Haziak. “Haziak-ek botere harremanak iraultzea du helburu. Bizikidetzan kokatzen da, eta dauden egoera desatseginekin konturatzea da helburua; horiek iraultzeko baliabideak ematen ditugu”, adierazi du Barrosok. Horrela, komunitate izpiritua dute, eta ahalduntzea sustatzen dute. “Haurrek gidaritza eskuratzen dute, eta prozesua hortik abiatzen da”, esan du. Aurretik ere egin dituzte beste hainbat jarduera. Adibidez, Torri Gukin herriko jubilatuen aisialdi egitasmoarekin abesti zaharrak landu zituzten behin, eta antzinako jolasak beste behin. Ez dira egin dituzte jarduera bakarrak izan: yoga familian saioak, enpatia jolasak, antzerki emanaldiak, “Jokin eta betaurrekoak” ikus-entzunezkoen lanketa , rap baten sorkuntza…

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.