Oiartzungo feministek agerraldi jendetsua egingo dute larunbatean

Martxoaren 8aren harira egingo dituzten ekitaldiak aurkeztuko dituzte; larunbatean bertan ere ekintza bat egingo dute

2018/02/26

Martxoaren 8an mundu mailako plantoa egingo dute.

Hainbat astez prestaketa lanetan aritu ondoren, Oiartzungo Feministen Asanbladak prest du Martxoaren 8ko egitaraua. Datorren larunbatean, martxoak 3, ekitaldi horien aurkezpena egingo dute. Horretarako, 12:00etan jarri dute zita, Sebastian Mendibururen estatuan. Agerraldi jendetsua egin nahi dute, eta Oiartzungo emakume feministak deitu dituzte, ahal bezain beste izan daitezen. Ez da aurkezpen agerraldi soila izango. Izan ere, hainbat alorretako emakumeek testu bana irakurriko dute. Horrez gain, agertuko diren guztiei eskaera egin diete: bakoitzak bere laneko arropa edota tresneria eramatea.

Hiru ekintza

Martxoaren 8an hiru ekintza egingo dituzte. Alde batetik, elkarretaratzea egingo dute herriko plaza nagusian, eguerdian, Mundua geldituko dugu, mundua mugitzeko. Bestetik, arratsaldean, kotxe karabana egingo dute, ikastolako aparkalekutik aterata. Etxetik erratzak, fregonak, trapuak eta beste eramateko eskatu dute. Azkenik, elkarretaratzea egingo dute Done Eztebe plazan, 19:30etik aurrera. Pintxo potera joango dira ondoren, Emakumeak planto challenge izeneko ekintza egingo dute. Bestalde, Zinegoak Bilboko zinema eta arte eszenikoen jaialdi lesbotransean eskainitako hainbat film labur eskainiko dituzte martxoaren 9an. Feministen asanbladak Oiartzungo Udalarekin batera antolatu du emanaldia.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.