Genero mainstreaminga ezarriko dute Oiartzungo Udalean, plenoak hala erabakita; genero politikak transbertsalak izango dira
Udalaren politika guztietara iritsiko da genero ikuspegia.
Genero mainstreaminga ezarriko dute Oiartzungo Udalean. Hala erabaki zuen atzo arratsaldean egin zuten plenoan, presente zeuden zinegotzi guztien aldeko botoarekin. Ingelesezko izen horren definizio teknikoa honakoa da, 1995ean ezarri zenez: “Politikaren izaera osoaren berrantolaketa da, eta horrek integrala, estrukturala eta horizontala izan behar du. Sail, maila eta fase guztietan eragin beharko du. Ezinbestekoa izango da politikarien parte hartzea, baita baliabide espezifikoak jartzea ere”. Horrela, Oiartzungo Udalak berdintasun mahai politiko bat eta beste tekniko bat martxan jarriko ditu, emakume eta gizonen arteko berdintasunera iristeko bidea urratzeko asmoz.
Batzorde politikoak berdintasun politiken ildo estrategikoak definituko ditu agintaldi bakoitzean, baita horiek aurrera eramateko baliabideak sortu ere. Horien jarraipena ere egingo dute. Batzorde teknikoa, berriz, koordinaziorako egitura egonkorra izango da, eta estrategiak aurrera eramateko ardura izango du. Udaleko sail bakoitzeko ordezkari bat izango da bertan.
Agurtzane Lekuona Berdintasun zinegotzia, azalpenak ematen.
Agurtzane Lekuona Berdintasun zinegotziak genero mainstreaminga ezartzearen prozesua azaldu zuen, laburbiltze aldera. Horrela, udaletxeko sail guztien politika guztietan genero ikuspegia txertatuko dela iragarri zuen. “Orain Berdintasun teknikari bat daukagu, baina helburua da sail hori isolatua ez izatea. Horregatik sortuko dira mahai teknikoa eta politikoa. Sail arteko batzordeak izango dira, eta batzorde teknikoak zehaztuko du zer egin behar den, eta batzorde politikoak ikusiko du betetzen ari den ala ez”, esan zuen.
Beste puntuak
Ez zen berdintasunaren ikuspegitik onartu zuten puntu bakarra izan. “Tokiko bizitzan emakume eta gizonen arteko berdintasuna” lortzeko helburua duen Europako Gutunarekin bat egin zuen udalak EH Bildu eta EAJko zinegotziek.
Beste arlo batzuetan murgilduta, 2014ko San Marko Mankomunitateko aurrekontuen Oiartzungo Udalari jarritako helegitearen berri eman zuten. Horrela, Araba, Bizkaia eta Gipuzkoako Auzitegi Gorenak arrazoia eman zion udalari, eta mankomunitatearen 2014ko aurrekontuak deuseztatu zituen. Ondorioz, epaia indarrean dago.
Galde eskeen txandan, Rafael Bergaretxe EAJko bozeramaileak gobernu taldeari galdetu zion ea nola dauden 2015eko eta 2016ko aurrekontuen auziak. Eneritz Arbelaitz alkateordeak azaldu zuenez, udal bakoitzaren ekarpena kalkulatzen ari da mankomunitatea, sententzia exekutatzeko. Udala esperoan da, eta 2015eko eta 2016ko errekurtsoak atzera bota dira, 2014koaren arrazoi berberak direlako.
