Ehun ontzi elkartuko dira Pasaiako Itsas Festibalean
Gaur aurkeztu dute jaialdia, Donibanen.
Data gerturatzen ari da, eta igarri da. Gaur goizean aurkeztu dute Donibanen maiatzaren 17tik 21era badiaren bueltan lehen aldiz egitekoa den Pasaiako Itsas Festibala. Aurkezpenean Albaolako buru Xabier Agote, Pasaiako alkate Izaskun Gomez, Gipuzkoako Foru Aldundiko Kultura, Turismo, Gazteria eta Kiroletako diputatu Denis Itxaso eta Eusko Jaurlaritzako Turismo, Merkataritza eta Kontsumo sailburu Alfredo Retortillo izan dira.
Agotek jakinarazi duenez Europako hainbat bazterretatik etorritako 100 itsasontzi tradizional elkartuko dira badian festibala bitartean. Nabarmendu duenez, jaialdiak oso harrera ona izan du bere lehen aldian, eta ehun ontziren kopurura iristean izen-ematea ixtea erabaki dutela jakinarazi du, antolakuntzari behar bezala erantzun ahal izateko.
Ontzi ikusgarri eta bisitagarriak
Badian festibalean ikusiko direnen artean askotariko ontziak izango dira, eta tartean harribitxi handiak eta bisitagarriak, Hermione edo Kaskelot ontziak kasu. Hermione Lafayette markesa 1780n Ameriketako independentzia gerran laguntzera eraman zuen belaontzi ikusgarriaren erreplika bat da, eta berau bisitatzeko sarrerak salgai daude jada. Kaskelot ontzia, Danimarkakoa, Atlantikoko azken atunontzi belaunaldikoa da.
Aurten jaioko den festibala bi urtero antolatzeko asmoz sortu dute, eta Xabier Agotek iragarri duenez, 2020. urtean Albaolan eraikitzen ari diren San Juan baleontzia uretan ikusteko aukera izango da.
Turismoari bultzada
Lehen edizioan Galizia izango da herrialde gonbidatua, Itxasok goraipatu duenez, eta gogorarazi dute ontzien topaketa bitartean, lehorrean, hamaika ekitaldi izango direla, musika, gastronomia eta erakusketak tartean.
Izan ere, festibalak Pasaiako itsas kultur ondareari bultzada emateko ez ezik, ekonomia suspertzeko ere baliatu nahi dute, Retortillok zehaztu duenez “kontzentratu gabeko eta sasoiz kanpoko turismoa” bultzatuz.
