Milatik gora oiartzuar behar dira. Arrazoia: erabakitzearen aldeko giza katea
Ekainaren 10eko giza katea aurkeztu diete oiartzuarrei; saretzen jarraituko dute, erabakitzeko eskubidea egikaritzeko bidean
Familia argazkia egingu te aurkezpen ekitaldia bukatu ondoren.
2019
Herritarron Itunean erabakitzeko dituzten 2019 arrazoiak jaso nahi dituzte. Zenbakia ez dute jartzeagatik jarri, datorren urtea erabakitzeko urtea izango dela ziurtatu dutelako baizik. Herritarron Itunak hiru fase izango ditu. Lehena, hiriburuetan egingo dituzten mahai-inguruak. Mahai horiek dira 2019 arrazoiak bilatzeko abiapuntua. Bigarrenik, herri eta eskualdeetan arrazoi gehiago jasotzeko ekitaldiak antolatuko dituzte. Azkenik, arrazoi guztiak bilduta, ekainaren 10ean plazaratuko dituzte. Oiartzuarrek egingo dioten ekarpena lau arrazoikoa izango da. Herritarron Ituna aurkezten duten egunean, giza katea egingo dute Donostian hasi, Bilbotik pasa eta Gasteizen bukatzeko. 201,9 kilometro egingo dituzte, 2014koan baino 78 gehiago. Oiartzuarrek 23. eta 24. kilometroetara joan beharko dute, Orio eta Zarautz artera. Mila oiartzuartik gora beharko dira ibilbidearen zati hori betetzeko. Horretarako antolatzen eta saretzen hasiko dira. Gure Esku Dagok azaldu duenez, hiriburu horietan ikusten dituzte dimentsio horretako mobilizazio bat egiteko. Hala ere, euren helburua, etorkizun hurbil batean, Euskal Herriko zazpi hiriburuak lotzea izango da. Euskal Herriko lurralde guztietan eragiten jarraituko dutela iragarri dute, tokian tokiko borondatea errespetatzen. Herritarrek esku bete lan izango dutela iragarri dute, baina ilusio eta konpromisoarekin egingo dutela ziurtatu dute. Aurrekariak ikusita, hala izango da.
