Sorginkerian murgilduko dira Gazte Akelarrean
Ernai eta Aitzina gazte erakunde independentistek Gazte Akelarrea egingo dute Oiartzunen, hilaren 30etik apirilaren 1era. Harremanak sortzeko gune izan nahi du
XVII. mendean ez bezala, egunean zehar egindako ekitaldiei emango diete garrantzia Oiartzungo Gazte Akelarrean.
Oiartzunen izango dela eta, eskualdeko gazteen artean ilusioa sumatu duteErnai 2013an sortu zen, eta udaberriro, Aste Santuko asteburuan, ekitaldiren bat egiten dute. Izen aldaketak izan ditu —akelarrea, Gazte Danbada, martxa…—, baina helburua berbera da: gazteen arteko harremanak sustatzeko aisialdi gune bat sortzea. Aurten Sorginkerian dugu independentzia leloa aukeratu dute, akelarreek zuten elkargune izaera konspiratiboa berpizte aldera. Ilusioa eta datak aldatu ez diren arren, formatua aldatuko dute. «Aurten, bereziki, ez zaio hainbesteko garrantzirik eman gaueko eskaintzari. Tailerretan, hitzaldietan eta horrelakoetan zentratu gara gehiago», baietsi du Matxainek. Ekitaldi nagusia larunbateko bazkaria izango da, gazteak gune berean elkartu eta harremanak sortzeko asmoz.
Alternatiben bozgorailu
Gazte Akelarrea esparru askotara iritsiko da, eta esparru asko iritsiko dira bertara. «Askotan esaten da», zehaztu du Oiartzunek, «proiektu eta ekitaldi asko ‘Herritik eta herriarentzat’ egiten direla, eta, uste dut, kasu honetan beteko dela». Eskualdean sortzen diren proiektu alternatiboak ezagutaraziko dituzte, eta adibide pare bat jarri: Errenteria-Oreretako etxebizitza komunitarioa edo Labore Oarso kontsumo kooperatiba. Bigarren horrek izango duen garrantzia irudikatzeko, iazko Gazte Akelarrean bizitakoa gogorarazi du Oiartzunek: «Gauzak aurrera eramateko dauden zailtasunak erakutsi nahi dira. Iaz, adibidez, baserriz baserri joan behar izan zuten janari bila». Ñabardura marraztu du Matxainek: «Horrelako ekitaldietan saiatzen gara burujabetza praktikan jartzen. Laborek, eskualde honetan, ematen digu aukera erraza eta zuzena gai horri heltzeko». Gazte Akelarrean jorratuko dituzten beste hainbat alor ere zerrendatu dituzte: herriko puntu ilunak seinalatzeko tailer bat; internazionalismoaren presentzia; Oarsoaldeko musika taldeen bozgorailua izan nahi dute… Oiartzunek azaldu duenez, gaueko eskaintzari garrantzia handiena emango ez dioten arren, gune guztiak izango dira aberatsak: «Gauekoa bera ere berdintasunean eraikitako gunea izango da, gure artean elikatzeko, eta gure artean zaintzeko. Beti egongo da parrandari garrantzia emango diotenak, edo biak uztartu nahi dituenak, edo dena delakoak». Horregatik, Gazte Akelarrea, egun batzuez bada ere, irudikatzen duten Euskal Herri txiki bat izango da: parekidea, feminista eta euskalduna.Aurtengo formatua ez da hain masiboa izango, komunitatea trinkotu nahianDatorren asteburuari begira, oraindik antolaketan ari diren arren, hainbat gauza lotuta dituzte jada. Eta sentsazio positiboak sorrarazten dizkie. Oiartzun: «Jende pila batek zaintza turnoak, oso zailak direnak, edo ordu txikitako txandak oso gustura hartu ditu, eta horrek poz berezi bat sortzen du. Urteetan gora egiten ari diren pertsona asko, gainera, laguntzen ari dira, eta horrek badu bere meritua».
Aurreko ekitaldiak
Matxainek gogorarazi duenez, aurreko ekitaldiak masifikatuagoak izan dira. Aurtengoa txikiagoa izango da, komunitatea landu eta trinkotzeko. Horregatik, Gipuzkoako Ernaik martxa bat egingo du, Gazte Akelarrea hasi baino egun bat lehenago. «Araban, Bizkaian eta Nafarroan ez bezala, Gipuzkoan harremanak ez daude hain saretuta. Donostiako Easo plazatik aterako da martxa, 15:00etan». Lehenengo zatia Errenteria-Oreretaraino izango da. 18:00etan egingo diete harrera, eta gaztetxera igoko dira. Atseden pixka bat hartuta, 20:00etan Belabaratzeko aterpetxera joango dira, eta han gaubela bat egingo dute. Biharamunean, Oiartzun aldera joango dira. Bestalde, bihar, Oiartzunen bertan, motorrak berotzeko festa egingo dute. 19:00etan poteo-ginkana aterako da Pottetik. 21:30ean afalduko dute (sarrerak Sorgin tabernan salgai daude, 7 euroren truke), eta ondorengo gaualdia Urbi Selektah eta Dantzall Soundek pintxatuko dute. Gazte Akelarrerako bonorik eskuratu ez duenak igandera arte dauka aukera. Hausnarketarako edo parrandarako —edo bietarako— gonbita luzatu diete gazteei, Oiartzun txiki utzi nahi dute eta.[ Gazte Akelarrea 2018 egitaraua ]
