Aurtengo festak iragartzeko proposamenak bidal daitezke, maiatzaren 31ra arte; edonork har dezake parte, nahi adina lanekin
2018ko xanistebanak iragarriko dituen kartelaren bila ari dira. Hori aukeratzeko lehiaketa ireki dute, eta marrazkilari edota diseinatzaileek maiatzaren 31ko 13:00etara arte izango dute udaletxeko harreran aurkezteko epea.
Baldintza batzuk bete beharko dituzte lanek. Alde batetik, tamainarena. 70×50 zentimetro neurtu beharko dute. Eta bestetik, Xanistebanak 2018 leloak nahi eta nahi ez agertu beharko du. Egileek lanetan genero irizpideak kontuan hartu beharko dituztela jakinarazi dute. Hiru baldintza horiek beteta, edozein adineko pertsonek har dezakete parte, eta nahi adina lan aurkeztu.
Xanistebanetako Jai Batzordeko kideek osatuko dute epaimahaia, eta genero irizpideak —eurek ere— kontuan hartuko dituzte aukeraketa garaian.
Sariak
Kartel onenak zein diren lehenago iragarriko badituzte ere, sari banaketa xanistebanetako kultur ekitaldian egingo dute, abuztuko lehen egunean.
Sariak honakoak izango dira: kartel irabazlea (600 euro); oiartzuar onena (300 euro); bi akzesit (50 euro) eta 100TZE Sormen Espazioan urtebeteko beka.