Hamahiru domina lortu dituzte pistako txirrindulari oiartzuarrek

Beñat Felipek, Ekain Jimenezek, Ekhiñe Rivasek eta Kattalin Iriondok junior eta kadete mailetako Espainiako Txapelketetan maila bikaina erakutsi dute

Erik Gartzia Egaña

Oiartzun

2018/04/03

Euskadiko selekzioak lortu zituen domina gehien [Argazkia: Real Federacion Española de Ciclismo].

Pasa den asteburuan jokatu berri dituzte pistako txirrindularitzako junior eta kadete mailetako Espainiako Txapelketak. Txirrindulari gazteak Tafallako Miguel Indurain belodromoan lehiatu dira, eta Euskadiko selekzioa izan da jaun eta jabe. 30 domina lortu dituzte Araba, Bizkaia eta Gipuzkoako ziklistek. Horien ia erdia oiartzuarrek lortu dituzte, bakarka, binaka edo taldeka. Beñat Felipe izan da arrakasta gehien eduki duena, lau urre lortu baititu junior mailan. Honakoa izan da duenaren zerrenda: madison proban, Iñaki Muruarekin; scratchean eta abiadurako bakarkako eta taldekako proban. Ekain Jimenezek, berriz, urre eta zilarrezko bina domina eskuratu ditu. Onena izan zen kilometro luzeko erlojupeko proban, eta Feliperekin batera taldekako abiadurako proban gailendu zen. Bakarkako abiadura proban eta keirinen geratu zen bigarren postuan.

Rivas eta Iriondo, bikain

Ekhiñe Rivasek, junior mailan baita ere, brontzezko hiru domina eta urrezko bat lortu zituen. Bakarkako abiadura probaren B finalean eskuratu zuen urrea, eta honako hiru probetan igo zen podiumaren hirugarren mailara: madisonen (Amaia Imazekin batera); puntuazioan eta taldekako abiadura proban. Kattalin Iriondo, berriz, kadete mailako txapelketan lehiatu zen. Besteek ez bezala, metal bakarra lortu zuen, baina ez nolanahikoa: taldekako jazarpen proban onenak izan ziren euskaldunak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.