Haurtzarokoek maskaradak bertatik bertara ezagutu dituzte

Maule-Lextarreko inauteriak ezagutzera joan dira ikastolako ikasle, guraso eta irakasleak; Zuberoako ikastolekin loturak indartzeko aukera probestu dute

Erik Gartzia Egaña

Oiartzun

2018/04/03

Haurtzaroko familia, Lextarreko Gurutze Xuriaren plazan.

Oporrak aprobetxatuz, Haurtzaro Ikastolako hainbat ikasle, guraso eta langile Maule-Lextarreraino joan ziren martxoaren 25ean, bertako inauteriak —maskaradak zehazki— bertatik bertara ezagutzera. Zuberoako ikastolekin hitzarmena du Oiartzungoak, eta urtero bizpahiru egun pasatzen dituzte bertan. Aurten, Lehen Hezkuntzako laugarren mailakoak Iribarneko aterpetxera joango dira, eta bidaia aprobetxatu zuten tokia ezagutzeko. Inauteriak, berriz, Sohütako Epherra ikastolako eta Alozekoekin batera gozatu zuten, eta egun pasa ederra egin zuten.

Lau urteko harremana

Badira lau urte hemengo eta hango ikastolek hitzarmena sinatu zutela. Proiektu horren barruan irakasleen arteko elkarlana sustatzen dute, pedagogia arloan, baina baita gurasoen artekoa ere. Oiartzuarrak Zuberoara joateaz gain, zuberotarrak ere Oiartzun bisitatzen dute urtero. Izan ere, Hego eta Ipar Euskal Herriaren arteko mugak lausotu nahi dituzte, Aritz Gonzalez Haurtzaroko zuzendariak gogorarazi duenez: “Muga politikoak ezartzen dituen muga mentalak gaindituz, elkar ezagutzea, elkarri laguntzea eta elkarrengandik ikastea da bilatzen ari garena”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.