Gradualki software pribatiboa albo batera uztea eta bere sistema guztiak software librean ezartzea erabaki du.
Arizabalo jauregian dago Pasaiako udaletxea, Donibanen.
Pasaiako Udalak informatika librearen aldeko hautua egiten du eta norabide horretan hainbat urrats egiteko konpromisoa hartu du. Iragarri dutenez, jabegoko programak soilik baliokide funtzionalik aurkitzen ez duten kasuetan erosiko dituzte, eta kasu horietan, beti erabilera partekatua sustatuko dute, lizentzien gastuak murrizteko.
Bestalde, Pasaiako Udalak garatzen duen software guztia software libre modura argitaratzeko konpromisoa hartu dute eta sortzen dituen artxibo eta agiri guztiak formatu irekietan egongo direla agindu dute.
Bide beretik, informatikako gaiak erosteko orduan, Hardwarea sistema eragile libreekin bateragarria izatea lehenetsiko dutela jakinarazi dute, eta kontratazio prozeduretan, informazioa euskarri informatikoan jaso behar denean, Pasaiako Udalak formatu estandarrak eta irekiak erabiltzeko eskatuko duela ohartarazi dute.