VIII. Mitxintxola mendi lasterketa, hilaren 15ean

Mitxintxola gainera iristeko 3,4 kilometroko bidea egin beharko dute parte hartzaileek, azken metroetan itsasotik 332 metrora igoz.

Urko Etxebeste Petrirena

Pasaia

2018/04/04

2014ko edizioa Uxune Tenak irabazi zuen emakumeetan.

Itsas Mendi Kirol eta Kultur elkarteak, Xanju Kirol Klubarekin elkarlanean, VIII. Mitxintxola Mendi Lasterketa antolatu du hilaren 15erako (igandea), goizez, Donibanen. Proba laburra da (3,4 kilometrokoa), baina oso gogorra, azken metroetan ia itsas mailatik 332 metrora igoko direlako parte hartzaileak, Mitxintxolako gaineraino. Ohikoa denez, lasterketaz gain, familiek parte hartzeko mendi martxa egingo dute helmugaraino. 11:00etan irtengo dira lasterkariak Santiago plazatik. Izen ematea doan da, eta plazan bertan apuntatu behar dira parte hartzaileak proba hasi aurretik. Motxilak eta arropa uzteko aukera plazan bertan izango dute korrikalariek, ondoren, proba bukatuta, hartzeko. Behin lasterketa burututa, sari emate ekitaldia Arrokaundietan (Kantinan ez) egingo dute, eta txapelak banatzeaz gain, parte hartzaileen arteko zozketa (mariskada bat) egingo dute. Noski, ez dira faltako pintxo beroak eta saldak esfortzua egin duten guztientzat. Bidea: Santiago plaza, Bonantzako eliza, Kantina (behekoa), Alabortza, eta handik malda gora Mitxintxolara. Mitxintxolako gainerainoko martxa —haurrek ere egiteko modukoa da— 10:00etan abiatuko da, plazatik ere. Bertan parte hartzera deitu dituzte antolatzaileek herritarrak eta kanpotarrak, tarte txikian, itsasotik mendi alderainoko bidea egitea gozagarri izango baita, Mitxintxolara iristean dauden bistekin ere goiz ederra pasatzeko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.