125 urte harmonian Antxon
Aurten 125 urte beteko ditu Pasaiako La Armonia elkarteak. Ekitaldi ugari antolatuko dituzte, tartean Done Jakue Bidea txandaka egitea
Pasai Antxoko La Armonia elkarteak osasuntsu jarraitzen du, 113 bazkiderekin.
Maiatzaren 21ean abiatuko dira Galizia aldera, 27 etapatan bidea egiteko asmozMaiatzaren 21ean (astelehena) hasi, eta 27 etapatan iritsiko dira Galiziako hiriburura. Ekainaren 16an bukatuko dute ibilaldia. Bezperarako, Novok esan duenez, Antxotik autobus bat ateratzea gustatuko litzaieke, han elkartu eta azkeneko etapa elkarrekin egiteko. Asteburu horretan afari bat edo festa bat egingo dute elkarrekin, Galizian. Armoniako bazkideek parte hartuko dute, baina herritar guztiei irekita dagoela ohartarazi du. «Zenbat eta jende gehiago elkartu, orduan eta errazagoa izango da bidea egitea», baietsi du. «Badaukagu jendea aste bat egingo duela, beste batzuk pare bat, baina gehienok asteburu bat edo asteburu bat eta bi egun gehiago egingo ditugu», jarraitu du. Etapak, gutxi gorabehera, lotuta dituzte, baina antxotarrak —eta nahi dutenak— animatzen dituzte, bertan parte har dezaten. Oreka bat bilatze aldera, etapa gogorrenak asteburuetan antolatu dituzte, eta astegunetakoak leunagoak izango dira, amu gisa. Euren helburua erromesaren txartela lortzea da, aterpetxeetan zigilatuta. Armonia elkarteak gordeko duen oroigarria izango da. Izena eman nahi duenak elkartearen lokaletik pasatu beharko du (Blas Lezo kalea, 3). Bide batez, hilaren 20an beteko dira 60 urte egoitza hori jabetzan erosi zutenetik. Ordura arte lokalez lokal ibili ziren, kokagune finkoa topatu zuten arte. Txangoa izango da antolatu duten ekitaldi nagusia. Horrez gain, jardunaldi batzuk antolatuko dituzte. Oraindik ez dute egitaraua finkatu, baina asmoak zein izango diren argi utzi nahi izan du Novok: «Sukaldari pare bat edo bi ekarri nahi ditugu, hitzaldiak ematera. Ez hori bakarrik: masterclassak ere antolatu nahi genituzke, sukaldari horiekin. Horrez gain, ardo, garagardo eta kaba dastaketak antolatu nahi ditugu». Urrian izango dira ekitaldi horiek, eta antxotarrekin herri bazkaria egiteko ere asmoa daukate. Gainera, Done Jakue Bideko irudiak proiektatzeko beste zita bat jarriko dute.
Barrutian txertatuta
Urtero ez dira 125 urte ospatzen eta urteurrenak merezi duen moduko ekitaldirik egiten. Hala ere, La Armoniak Antxon duen presentzia urte osoan oso zabala da. Elkartearen estatutuetan idatzita dagoenez, barrutiaren intereseko ekitaldietan parte hartu behar dute, edo eurek antolatu. «Herriarentzako onuragarria da, baina baita guretzako ere. Herriko jardunaldietan parte hartzeak bazkideak xaxatzen ditu, eta egun horietan gure elkartea jendez lepo egoten da», azaldu du Unai Martin La Armoniako bazkideak. Ia hutsik egin gabe antolatzen dituzten ekitaldien zerrenda nahiko luzea da. Bazkideen bazkaria; barrikotea; duela bospasei urte hasi zuten emakumeen bazkaria; sanferminetako haurrentzako gastronomia txapelketa; xake txapelketa —1960 eta 1970eko hamarkadetan elkarteak txapeldun asko eman zituen—… Horiek La Armoniak antolatzen dituen ekitaldietako batzuk. Herrietako beste eragileekin batera aritzen dira Antxoberfesten, esaterako. Garagardoa da nagusi festa horretan, baina norbaitek janaria prestatzeko ardura hartu behar du. Sukalde lanetan aritzen dira La Armoniakoak. San Tomas Egunean zein San Fermin Txiki festetan ere parte hartzen dute.Urrian jardunaldi batzuk antolatuko dituzte, gastronomia ardatz dutela«Edozer gauza egiteko prest gaude», esan du Novok. «Gu, orain arte, sanferminetako Jai Batzordean egon gara, parte hartzaile moduan. Orain pixkat aparte gara, sekulako lana eduki ohi dugulako. Hori bai, zerbaiten laguntza behar baldin badute, prest gaude emateko». 125 urteko historia luzea izan arren, ez dira asko gordetzen dituzten dokumentu eta argazkiak. Horregatik, norbaitek etxean La Armonia elkartearekin zerikusia duen materialik badu, elkarteko kideei modu batera edo bestera helarazteko eskatu dute. Hori aintzinako dokumentuei dagokienez; aurrera begira, La Armoniak bere historia propioaren orrialdeak idazten jarraituko baitu. Ez dute, baina, orrialde zuririk aurrean, 113 bazkideek badakitelako zer idatzi.
