Ertzaintzak lapur talde bat desegin du, Errenterian-Oreretan harrapatuta

Etxebizitza eta dendetan lapurtzen zuten; Kaputxinoetako etxebizitza batean 'in fraganti' harrapatu zituzten pasa den igandean

Erik Gartzia Egaña

Errenteria-Orereta

2018/04/06

Ertzaintzak atzemandako materiala.

Ertzaintzak lapur talde bat desegin du. Pasa den igandean atxilotu zituzten, Errenteria-Oreretako Kaputxinoetako auzoko etxebizitza batean in fraganti harrapatuta. Atxilotutakoak 41 urteko bi gizon eta 30 urteko beste bat dira. Jakinarazi dutenez, talde hori bera iazko urrian ikertu zuten, Gipuzkoan. Talde horretako hiru kidek herrialdetik alde egin zuten, eta ertzainek lapurretan aritzeko erremintak hauteman zizkieten. Orain gutxi bueltatu ziren EAEra, eta poliziak zaintza dispositiboa jarri zieten. Horrela frogatu zuten Gipuzkoako herrietan zebiltzala, segurtasun neurri estuak hartuz. Pasa den igandean, Sorgintxulo kaleko atari bat plastikozko txartel batekin ireki zuten taldeko kideetako bik, eta hirugarrena auto batean geratu zen, zaintza lanetan. Etxebizitzatik atera zirenean atxilotu zituzten. Bitxiak, sakelako telefonoak, ordenagailu bat, gakordeak eta beste erreminta batzuk atzeman zizkieten, beste hainbat objekturen artean. Ondoren, taldeak erabiltzen zituen bi lokak miatu zituzten; bat Oiartzunen, eta bestea Astigarragan. Hor ere hainbat erreminta topatu zituzten. Arrasaten eta Astigarragan egindako hiru lapurretekin ustez zerikusia dutela jakinarazi dute. Donostiako Guardiako epaitegiaren esku utzi zituzten hiru atxilotuak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.