Sakanako bailararen ikuspegi ikusgarria eskaintzen du Beriain mendiak.
Iaz antolatu zuen lehenbizikoz Trintxer Mendi Taldeak
gaueko ibilaldia, taldearen 25. urteurrenaren ospakizunen barruan, eta ekitaldi hark izan zuen arrakastak bultzatuta, aurten esperientzia errepikatzea erabaki dute mendi taldeko arduradunek.
Maiatzaren 26an izango da irteera, Beriain mendia gauez igotzeko, Lizarragatik aterata. Izena emateko aukera maiatzaren 22ra bitartean egongo da, eta izen-emateak 30 euro balio du, afaria eta autobusa barne.
Taldeko arduradunek jakinarazi dutenez, elkartean afalduko dute, Trintxerpen, eta afaldu ondoren, 23:00ak inguru, autobusez joango dira Lizarragaraino.
Aurreragoko zita bat ere gogorarazi du mendi taldeak. Ekainaren 16 eta 17an Euskal Herriko Biraren barruan Hiru Erregeen Mahaia igoko dutela iragarri dute, gaua Urdaburuk Zurizan duen aterpean igarota.