Euskal Herria Kirolak antolatutako txapelketaren VIII. ekitaldian parte hartuko du talde urdinak; larunbatean Zarautz zelaian jokatuko dute
Oiartzun orain dela bi urte Athleticen kontra neurtu zen, finalerdietan.
Oiartzun Kirol Elkarteko nesken futbol talde nagusiak pasa den igandean bukatu zuen Bigarren Mailako liga. Karla Lekuonara hurbildu ziren jarraitzaileak ez zituzten modu onenean agurtu, 2-3 galdu baitzuten Gasteizko Aurreraren kontra. Sailkapeneko seigarren postuan bukatu dute liga.
Denboraldi
ofiziala bukatuta, atsedenik ez dute hartuko. Datorren larunbatean, hilak 28, Euskal Koparen VIII. ekitaldian hasiko dute ibilbidea. Euskal Herriko hamahiru taldek hartuko dute parte. Talde indartsuenek —Realak eta Athleticek— finalerdietan toki bana ziurtatuta dute, eta gainontzeko taldeak lau multzotan banatu dituzte.
Oiartzuni Añorga eta Zarautzekin egokitu zaio taldean. Larunbatean etxetik kanpo jokatuko dute, Zarautzen. Partida 12:00etan hasiko da, Asti futbol zelaian.
Euskal Herri osoko taldeak
Txapelketako lehenengo partida gaur izango da. Aurrera eta Eibar nor baino nor ariko dira, Gasteizko Olaranbe zelaian.
Euskal Herriko talde indartsuenek hartuko dute parte txapelketan. Aipatutako taldeez gain, Nafarroako bi talde (Osasuna eta Arangurengo Mulier) eta Lapurdiko beste bik (Angeluko Genets eta Baionako Aviron) ariko dira. Bilboko San Ignacio eta Barakaldoko Pauldarrak taldeak ere ariko dira.
