Hondakinentzako ekarpen gune berria jarri dute Herriondon

Lezoko Udalak esan duenez, Herriondo eta inguruko bizilagunei zuzendutako zerbitzua hobetu nahi dute, baita erosoago bilakatu ere

Erik Gartzia Egaña

Lezo

2018/05/09

Ontzi arinak, errefusa, organikoa eta papera jasoko dituzte Herriondon.

Lezoko Udalak hondakinen bilketa sistema berria jarri zuen martxan, pasa den irailean. Erabaki hori hartzeko arrazoia herritarrei erraztasunak ematea izan zen, bilketa datuak hobetze aldera. Ordutik, hainbat aldaketa egin dituzte sisteman, baita informazio eta sentsibilizazio kanpainak aurrera eraman ere. Hondakinen kantitatea murriztu eta kalitatea hobetzea izan da, udalaren arabera, horren helburua. Gainera, gune batzuetan maiztasuna areagotzeko beharra ikusi dute, eta San Markos Mankomunitatearekin hitz egin ondoren, hori gauzatu dute. Orain beste berritasun bat gehitu dute, sistema aldaketa horren barruan: Herriondon hondakinen ekarpen gune bat jarri dute. Errekalden, Gaintxurizketa Goikoan eta Perrenen daudenei batuko zaie. Beira izan ezik, gainontzeko hondakin motak jasotzeko lau edukiontziak daude. Ekarpen gune hori erabili nahi duenak Hondakinen Bulegotik pasatu beharko du. Astelehenetik ostiralera irekita dago, 10:00etatik 13:30era. Han txartela jasoko dute, ekarpen gunearen sarraila irekitzeko. Informazio gehiago nahi duenak, bulegora dei dezake (943 52 15 38) edo e-posta bidez idatzi. Bestalde, udalak jakinarazi du Errekalde ekarpen gunea berrituko duela, egoera kaskarrean dagoelako. Esan dute askotan egoten direla hondakin isurketak, eta hori konponduko dutela, auzotarrei zerbitzu hobea emateko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.