Ttipi-ttapa, ttipi ttapa, Redadegera

'Bretainiako Korrika'-n parte hartzeko autobusa aterako da gaur gauean Oiartzundik; 24 lagun joango dira, eta ostiral eta larunbatean egingo dute korri

Erik Gartzia Egaña

Oiartzun

2018/05/09

Saioa Ballesteros (AEK), Amaia Arruti (AEK), Aritz Gonzalez (Ikastola), Josune Cousillas (Kultura zinegotzia) eta Joxe Ostolaza (Senidetza elkartea).

AEK-k urte bakoitietan antolatzen du Korrika. Aurten urte bikoitia da, eta ez da Korrikarik egongo. Arantza hori kentzeko —eta elkartasunagatik, noski—, Oiartzundik autobusa irtengo da gaur gauean. Helmuga Bretainia izango da; zehazki, hango Redadeg. Bretoieraren aldeko lasterketa da, eta Korrikaren eredua jarraituta lortu zuten. Euskal Herrikoan bezala, eragileek Bretainiakoan ere kilometroak erosten dituzte. Oiartzungo lau eragilek kilometro bana erosi dute Redadegen: Oiartzun-Karaez Senidetza Batzordeak, Haurtzaro Ikastolak, udalak eta Oarsoaldeko AEK-k. Guztira, 24 lagunek bat egin dute deialdiarekin. Gaur atera eta igandean irtengo dira, 22:00etan. Hamabi bat orduko bidaiaren ondoren, Karaezeko udaletxean harrera instituzionala egingo diote Oiartzungo ordezkaritzari. Udalaren izenean joango dira Domi Azpiroz eta Josune Cousillas zinegotziak. Bihar ongietorriaren txanda izango da, baina ostiral eta larunbatean zapatilak jantzi beharko dituzte, bretoieraren aldeko lasterketan parte hartzeko. Bidaiaren aurkezpena aprobetxatuta, Oiartzungo Udalak senidetza batzordeari eskerrak eman dizkio: “Senidetza Elkarteak 1994an gure bi herriak senidetu zirenetik Bretainia eta Euskal Herriaren arteko harremanak indartzeko egin duen lana eskertu nahi du”. AEK eta Haurtzaroren lana ere aitortu dute, Euskal Herrian euskara sustatzeagatik eta bretoierari emandako laguntzagatik.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.