Santiago Sierraren 'Preso politikoak gaur egungo Espainian' erakusketa zabaldu dute gaur; solasaldi parea ere antolatu dute
Altsasuko gazteetako biren amak, tartean euren seme-alaben kasua salatzen duen argazkia dutela.
Santiago Serraren
Preso politikoak egungo Espainian artelana Reina areto berrituan ikus daiteke hilaren 26ra arte.
ARCOk zentsuratu zuen artelana “adierazpen askatasunaren defentsa argia” egiteko ekarri du herrira Errenteriako Udalak, “adierazpen askatasuna edozein gizarte demokratikoren zutabeetako bat da. Artelan bat arte zirkuituetatik desagerraraztea, deserosoa izan daitekeelakoan, demokrazia bera ahultzen du eta printzipio demokratiko honen kontra doa”. Gaur arratsaldean zabaldu dute erakusketa, herritarren eta hedabideen presentzia nabarmenarekin.
Santiago Serrak doan ekarri du bere artelana herrira. Udala harekin hartuemanean jarri, eta herrira ekartzea erabaki zuen sortzaileak; azken aldiz Lleidan (Katalunia) ikusi ahal izan da: 7.000 bisitari izan ditu han. Hala, hainbat esparrutan polemika eragin duen sorkuntzan, besteak beste, Solidari@s talde ekologistako kideak,
La bruja y don Cristobal lanarengatik atxilotu eta epaitu zituzten titiriteroak,
Egin egunkariko zuzendariak, politiko katalanak, edo Altsasuko gazteak ageri dira. Eta bertan ere ikus daiteke 2017ko martxoaren 11n Iruñean atxilotu zituzten Errenteriako gazteetako baten erretratua.
Hilaren 21etik 23ra Madrilen epaituko dituzte gazteak. Nafarroako eta Oarsoaldeko gazte horien gurasoak inaugurazio ekitaldian egon dira.
Reinako erakusketa honako ordutegian egongo da zabalik (sarrera Koldo Mitxelena plazatik izango da): astelehenetik ostiralera 17:30etik 20:30era; larunbatetan 11:00etatik 14:00etara eta 15:30etik 20:30era; eta igandetan 11:00etatik 14:00etara.
Programazio osagarria
Erakusketari eduki zabalagoa eman nahi izan dio Errenteriako Udalak. Horregatik, artelana herrian dela aitzakiarekin, adierazpen askatasuna ardatz izango dituzten bi mahai-inguru antolatu dituzte. Honakoak:
- Hilaren 17an (osteguna) 19:30ean eta Reina aretoan: mahai-ingurua Garbiñe Biurrun epailearekin eta Martxelo Otamendi kazetari eta Berria egunkariaren zuzendariarekin.
- Hilak 21 (astelehena), 19:30ean eta Reina aretoan: mahai-ingurua Mariano Ferrer, Lourdes Perez eta Dani Alvarez kazetariekin.
