Gaur du Antxoberfestek egun handia. 18:00etan auto eta moto klasikoek urteroko trumoikada egingo dute.
Antxoberfestek gaur du egun handia.
Antxoberfestek gaur du egun handia. Ostegunean zabaldu zuten garagardo azoka eta dagoeneko hamarnaka eta hamarnaka pasaitar pasa dira bertatik. Eguraldia ez dute izan lagun gaur, baina hala ere, eguerdiarekin batera hasi da jendea bertaratzen Gure Zumardian jarritako karpara. Herri bazkaria zuten bertan eta 100 lagunetik gora espero zituzten. Goiz partean hasi dira prestatzen herri bazkari horretarako paella.
Eguraldiak ez ditu garagardozaleak kikildu, ezta Amarican Crazy Cars-en eta moto klasikoen topaketako parte hartzaileak, eta lagun asko hurbildu dira halako ibilgailuak ikustea ez delako ohikoa, gainean jartzen ausartu direnak ere izan dira, batez ere haurrak. Ibilgailu horiek trumoikada egingo dute 18:00etan, auto eta moto klasiko guztiak errepidera irtengo dira desfilea egitera, baina batez ere burrunba. Haurren Koloreak konpartsak girotu behar zituen kaleak 17:00etatik aurrera, baina eguraldia dela–eta bertan behera gelditu da desfile hori.
20:00etan aurtengo kofradearen aurkezpena egingo dute: Armonia elkartea, festaren antolatzaileetako bat, bere 125. urteurrenean. Hortik aurrera, berriz, afaria, eta garagardoak laguntzeko, Elektrotxufla (20:30), eta DJ Bullen (24:00) emanaldiak izango dira.
Antolatzaileak pozik daude azokak izan duen erantzunarekin, “gaur ikusi beharko da eguraldiak ez duelako laguntzen, baina aurreko bi egunetan jende ugari bildu da karpara garagardoarekin gozatzera, baita jatekoekin ere”.