Herrira ezingo denez autoz iritsi, Renfe, Euskotren eta Lurraldebuseko zerbitzuak indartuko dituzte.
Garraio publikoa indartzeko eskainiko diren zerbitzuen berri eman dute gaur.
Jende etorrera “masiboa” espero dute Pasaian Itsas Festibala bitartean, eta herria kolapsatu ez dadin bisitariei auto partikularretan ez etortzeko eskatu diete. Itxita egongo dira trafikoarentzat Trintxerpe, San Pedro eta Donibane, eta
soilik egoiliarrei, larrialdi zerbitzuei eta garraio publikoari erraztuko zaizkie sarrera-irteerak, herri barruko aparkalekuak soilik egoiliarrentzat gordeko dituztelako.
Gaur goizean iragarri dituzte trafiko aldaketak, eta era berean, garraio publikoa indartzeko hartuko dituzten neurriak jakinarazi Gipuzkoako aldundiaren egoitzan egin duten agerraldian. Han izan dira Izaskun Gomez Pasaiako alkatea, Marisol Garmendia Lurralde Antolamendu eta Mugikortasun diputatua eta Maite Cruzado, aldundiko turismo zuzendaria.
Izaskun Gomezek azaldu duenez, herriko erdigunea oinezkoentzat gordeko dute eta bisitariei garraio publikoan etortzeko eskatu die, hala egin ezean festibala bisitatzeko aukerarik gabe gera daitezkeela ohartaraziz. Trena, eta topoa gomendatu ditu, edukiera handiagoa dutelako, baina autobus zerbitzuak ere indartuko dituztela iragarri du. Zerbitzu horien gaineko informazioa konpainia bakoitzaren webgunean ez ezik,
Pasaiako Itsas festibalaren webgunean kontsultatu ahalko dela jakinarazi du alkateak.
Motora eta txu-txu trena
Horrez gain, herri barruan mugitu ahal izateko motora zerbitzua egongo dela iragarri du alkateak. Trintxerpeko Hospitalillotik Donibaneko Bizkaia Plazara joango da motora, eta handik San Pedrora.
Motoraren txartelak euro bat balio du, baina egunerako bonuak ere salduko dituzte, 5 euroan, nahi adina bidaietan erabiltzeko aukerarekin. Ostegunean 17:00etatik 21:00etara egongo da motora erabilgarri, eta ostiral eta larunbatean 10:00etatik eta 21:00ak arte.
Txu-txu tren bat ere ibiliko da Trintxerpe eta San Pedro artean ostirala eta larunbatean, 10:00etatik 21:00etara. Trenerako txartelak euro batean salduko dituzte.
Horiez gain, Ipar Euskal Herritik heldu daitezkeen bisitariekin pentsatuta, Ficoban doako aparkalekua atonduko dute, handik jendea EuskoTrenera (topora) bideratzeko.
Autobusak maizago, baita gauez ere
Mugikortasun diputatu Marisol Garmendiak
Lurraldebus konpainiak eskainiko dituen zerbitzuen berri eman du, eta besteak beste iragarri du asteburuan lan egunetako ordutegiei eutsi eta autobusak ordu laurdenero ibiliko direla San Pedro eta Donibanetik.
Gauez ere autobus zerbitzuak egongo dira, 23:00etatik aurrera eta 04:00ak bitartean. 15 minutuero ibiliko da San Pedroko gaueko autobusa, eta 20 minutuero Donibanekoa.
Horrez gain, Errenteriatik Donibanera autobus zerbitzu berezia jarriko dutela iragarri dute, bi geltokiekin: Nafarroa etorbidean eta RENFEko geltokian. 19:00etatik aurrera eskainiko du zerbitzua egunero, batez ere Irun aldetik etorriko den jendeari zerbitzua erraztu asmoz.
Garmendiak jakinarazi duenez, Lurraldebusek bere webgunearen bidez emango du zerbitzu guztien gaineko informazioa eta gogoratu du telefono bat ere badela erabilgarri. Interesdunek 900 300 340 telefonora dei dezakete 08:00etatik 20:00etara informazio gehiago behar izatekotan.
