Festa motzak dira, baina maiteak

Gaur hasiko dira Lezoko mendekosteak, Zabarre pirataren etorrera berezi batekin. Igandera arte 32 ekitaldi antolatu dituzte herriko talde eta eragileek, askotariko adin eta pertsonentzako

Erik Gartzia

Lezo

2018/05/18

Iaz, Zabarre pirataren zain, lezoarrak.

Bukatu da lehortea. Auzoko jai batzuk aparte utzita, hemen dira Oarsoaldeko lehen festa indartsuak. Gaur arratsean hasiko dira Lezoko mendekosteak. Laburrak baina intentsoak izango dira igandera arte luzatuko diren festak. Herriko talde eta eragileek, guztira, 32 ekitaldi kontzentratu dituzte hiru jardunaldi horietan. Urtero bezala, Zabarreren etorrerak emango die hasiera festei. Aurten berezia izango dela iragarri dute, baina beste zehaztasunik eman ez dutenez, kaira joan beharko da 17:45ean, sorpresa zein den ikustera. Handik plazara abiatuko da segizioa, eta alkate txikiek pregoia irakurriko dute. Ioritz Intxaurrandieta Oiartzabalek eta Aiora Intxaurrandieta Amianok izango dute ohore hori. Berritasunei dagokienez, orain arte bakoitzak bere aldetik egin zuen afariak elkartuko dira gaur gauean: piratek eta gazte asanbladak antolatzen zituzten afariek bat egingo dute. Guztira, 400 lagun inguru elkartuko dira herriko plaza nagusian. Ez da zifra makala: Lezoko erroldaren %6,6 da hori. Beste berritasun bat Lezo Herri Eskolako muralaren margotzea izango da. Ikastetxe horretako hainbat ikasle Judas Arrieta artista hondarribiarrarekin ari dira lanean, eta bihar goizean bukatuko dute ikasketa prozesu hori. Bihar arratsaldean, beste zentzu batean, sagardo eguna ospatuko dute, urteurren biribilarekin: hogeigarren aldiz egingo dute. Gainera, kale antzerkiarekin gozatzeko aukera egongo da, igande arratsaldean, festak bukatu baino lehen. Markeliñe eskarmentu handiko taldeak Andante ikuskizun ibiltaria zabalduko du herriko kaleetan. Aldi berean, raketisten jarduera jendartean zabaltzeko hainbat jarduera egingo dituzte jaiak bitartean. Hemen horien berri. Jarrera sexistei ez Eraso sexisten aurrean herritarrek jarrera aktiboagoa izan dezaten eta eraso sexistarik gabeko jaien alde egiteko, sentsibilizazio eta kontzientziazio kanpaina egingo du udalak. Horri begira, indarkeriarik gabeko gunea jarriko du Gurutze Santuaren plazan hilaren 18an, larunbata, 18:00etatik 21:00etara Emagin elkartearen eskutik. Helburua eraso matxista, sexista, homolestransfobo eta arrazistarik gabeko jaiak aldarrikatzea da. Karpan banatuko dituzten txapak soinean janztera animatu dituzte, eta udalak ere pankarta bat jarriko du. Aurten ere emakumeen elkarteekin eta jai batzordearekin findu dute egitaraua. Beraz, jarrera horiek alde batera utzita, festa giroan ez murgiltzeko aitzakiarik ez da. Bukatu da lehortea, has dadila festa. Gaurko (ostirala) egitaraua:

17:45ean. Zabarreri ongietorria, kaian.
19:00etan. Zabarre udaletxeko atarira helduko da. Pirata Txikiek pregoia irakurri eta jaiei hasiera emango diete. Gero, Murixkaren agurra eta Munttar Txistulari Taldearekin eta buruhandi eta erraldoiekin, kalejira.
19:30ean. Ordiziako Umore Ona eta Lezoko Aiton Borda abesbatzen emanaldia Gezalan Auditoriumean.
20:00etan. Preso eta iheslarien aldeko kartelada.
21:00etan. Piraten eta gazte asanbladako kideen afaria Gurutze Santuaren plazan. Amaieran Dj Iker, eta jarraian, Dinbi Danba batukada herrian zehar.
22:30ean. Kaskezur eta Los Nitxos taldeak, Txerimuñon.

Hilak 19, larunbata

09:30: Diana eskualdeko dultzaineroekin.
09:30: Motozaleen elkarretaratzea.
10:00: Lezoko Herri Eskolako patioko murala margotzea.
12:00: Buruhandi eta Erraldoeikin kalejira Munttar txistulari taldearekin Bekoerrota kiroldegitik abiatuta.
12:00: XX. mende hasierako erromerien dantzak herrian zehar.
12:30: Kantujira Aiton Bordatik abiatuta.
13:00: Musika Eskolako Banda eta Lezoko Dantzazaleen emanaldia Gurutze Santuaren plazan.
14:00: Motozaleen bazkaria Saldise plazan. Bitartean motoak ikusgai.
16:00: Truk txapelketa Tiñelu elkartean eta Xake txapelketa Polentzarrene auzoan.
17:00: DJ Festa Karlos Saldise plazan.
18:00: XX. Sagardo Eguna Gurutze Santuaren plazan (eguraldi txarrarekin Saldise plazan). Hasieran, Lezoko Dantzazaleen Mahai gaineko dantza.
19:00: Buruhandi eta Erraldoeikin kalejira Munttar txistulari taldearekin Bekoerrota kiroldegitik abiatuta.
20:00: Zezen suzkoa Gurutze Santuaren plazan eta jarraian Orkestrina banda jazpana taldearen emanaldia.
23:00: Jaig taldea eta The Graps Lezoko Musika Eskolako taldeen kontzertua, Karlos Saldise plazan. Jarrain, Reggae Gaua: dantzall Sound, Polas Selektah, Sista Kata, eta Bad sound system.

Hilak 20, igandea

09:30: Diana eskualdeko dultzaineroekin.
10:30: Pintxo lehiaketa haur eta gaztetxoentzat Karlos Saldise plazan. Jarraian euskal dantzak.
10:45: Emakume Rakestisten arteko partidua, Bekoerrotako kiroldegiko frontoian.
12:00: Herri kirolen erakustaldia Gurutze Santauren plazan. Joseba Ostozala harrian eta Manolo Kañamares eta Fausto Mugerza aizkora lanetan.
12:00: Buruhandi eta Erraldoeikin kalejira Munttar txistulari taldearekin Karlos Saldise plazatik abiatuta.
12:00: Triki-kantu poteoa Gurutze Santuaren plazatik abiatuta.
16:30: Altxorraren bila. Irteera Gurutze Santauren plazatik. Mozorrotuak joateko eskatu dute.
18:00: Pilota partida: alebinak eta amaieran helduak, Goiko Plaza frontoian.
19:30: kale antzerkia: Markeline konpainiaren Andante, Musika Eskolako plazatik abiatuta Gurutze Santuaren plazaraino.
21:45: Zezen suzkoa Gurutze Santuaren plazan musika eskolako bandak lagunduta.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.