Lezoko Udalak auzoa hobetzeko aurrera eramaten ari den parte hartze prozesuari ekarpena egin dio Altamirako auzo elkarteak
Auzoko eremu berdeetan belarra oso altu dagoela uste du auzo elkarteak.
Lezoko Udalak orain dela bi aste aurkeztu zuen
Altamirarako parte hartze prozesua. Auzoa hobetzeko hartu beharreko erabakiak hartu nahi dituzte, bertako biztanleekin kontsultatu ondoren. Altzate auzo elkarteak bere ekarpena egin nahi dio parte hartze prozesu horri, eta lehentasunak zeintzuk diren adierazi dituzte. Lau esparrutan banatu dituzte.
Alde batetik, auzorako irisgarritasuna hobetzea nahi dute. Duela gutxi egin zituzten obrak, baina espero zuten emaitzarik eman ez dutela uste du auzo elkarteak: “Sarbide horiek Errenteriatik etortzen direnentzat edo kiroldegira joan nahi dutenei bidea errazten diete. Gure ustez, auzotarrek gehiago erabiltzen dute herrigunea eta auzoa lotzen duen bidea —portutik—”. Gainera, auzoko soto batzuetan sartzeko arrapalak falta direla gogorarazi dute, baita zebrabide batzuetan ere.
“Uste dugu”, jarraitu dute, “irisgarritasunaren gaia lasai eta modu sakonean jorratu behar dela, sotoetatik bertatik hasita. Gehienok ez dugu igogailurik, eta Altamiran edadetu asko bizi dira”. Horregatik, iritzi dute igogailuak jartzeko aholkularitza zerbitzua eskatu diote udalari. “Behar izanez gero, Lezoko Udalak eska diezaioke Gipuzkoako Foru Aldundiari diru laguntzak emateko, edo aurrekontuetan partida bat gordetzeko”.
Ez dituzte auzoaren goi aldeko bizilagunak ahaztu. Haien etxebizitzetara joatea erraztuko luke igogailu batek, auzo elkartearen arabera. Igerilekuko aparkalekutik anfiteatrora joatera proposatzen dute.
Argia, espaloiak eta trena
Altzateren bigarren lehentasuna espaloiak konpontzea da. “Orain arte
petatxuak jarri dira, baina oraindik zuloak daude eta zaila da bertatik ibiltzea”, esan dute. Zona berdeei dagokionez, esan dute toki askotan belarra luze egoten dela.
Kale argiztapenarena da hirugarren lehentasuna. Hainbat farola ez dabiltzala esan dute, eta baten bat gehiago jarriko luketela. “Kanpoan dagoen auzoa da, eta gauetan ez da jende asko ibiltzen. Argiztapena oso garrantzitsua da auzotarron lasaitasunarentzako”, zehaztu dute.
Azkenik, Abiadura Handiko Trenaren obrak direla eta, soinu hesiak jartzea eskatu dute. Obren zarata entzuten dela ziurtatu dute, eta trena pasatzen denean entzungo dela esan dute. “Auzoaren ekialdean bizi direnentzat ez da atsegina izango”, iragarri dute.
Horregatik, udalari eskatu diote parte hartze prozesua anfiteatroaren eremura muga ez dezan. “Noski, badakigu hobekuntzak behar dituela sarbideetan, eremu berdean eta argiztapenean. Auzoan bueltaxka bat ematea eskatzen diegu, eta bizilagunen benetako beharrak zeintzuk diren entzutea, dirua non inbertitu jakiteko”.
