Gaika biltzen diren hondakinen kalitatea altua dela jakinarazi dute

Gaur bete dira zortzi urte atez ateko sistema martxan jarri zenetik; Ecoembesen datuen arabera, ingurukoek baino gehiago bereizten dute oiartzuarrek

Erik Gartzia Egaña

Oiartzun

2018/05/23

Paper eta kartoiaren zein ontzi arinen frakzioak neurtu dituzte.

Gaur bete dira zortzi urte Oiartzunen hondakinak gaika biltzen hasi zirenetik. Bilketa mota horrek eman dituen datuak onak dira, Ecoembes enpresaren arabera. Izan ere, paper eta kartoiari zein ontzi arinei dagozkien datuak ikertu eta ezagutarazi ditu. Horrela, oiartzuarrek inguruko herrietako biztanleek baino gehiago bereizten dituzte hondakin mota horiek. Gainera, kalitate onekoa da jasotzen den hondakina: %12 besterik ez da inpropioa. Iaz 347.620 kilo ontzi arin jaso zituzten Oiartzunen. Aurreko urtearekin alderatuta, %9,34 igo zen, eta herritar bakoitzeko 34,2 kilo jaso zituzten (2016an baino %7,12 gehiago). Hurbileko herrialdeekin alderatuta, datu ona da. Izan ere, Gipuzkoan 28 kilo dira pertsonako, Araban hogei eta Bizkaian hamabost besterik ez. Papera eta kartoiaren zatian ere, 2016an baino hondakin gehiago jaso da. 395.380 kilo jaso zituzten (%4,37 igo zen); pertsonako 38,9 kilo (%2,28 gora). Oiartzuarrek besteek baino gehiago bereizten dute kasu horretan ere bai. Gipuzkoan hamabost kilo biltzen herritar bakoitzagatik, eta Araba eta Bizkaian hamahiru baino gutxiago. Kalitatea, hobetzen Ecoembes enpresak jasotzen den hondakinen kalitatea neurtu du. Horrela, frakzio bakoitzari ez dagokion hondakinen —inpropioaren— kopurua %12,28 izan zen. Aurreko bi urteen tendentzia hautsi da, eta inpropioaren kopuruak nabarmen egin du behera. Oiartzungo Udala pozik da datu horiekin. “Paper eta kartoi zein ontzi arin asko biltzen dugu Oiartzunen, eta horrek errefusean hondakin birziklagarriak gutxi direla adierazten du”. Hala ere, gogorarazi dute hondakin kopuru txikiagoa sortzea dela helburuetako bat. Horregatik, erosketak-eta egiterakoan, hori kontuan hartzeko gomendatu die udalak oiartzuarrei.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.