2019 eta 2023 urteen arteko agintaldiaren ildoak finkatzeko bilerak egingo dituzte; lehen bilera ostegunean izango da
EH Bilduko kideak, tartean zinegotzi gehienak, herri programaren prozesuaren aurkezpenean.
Urtebete inguru falta da udal hauteskundeak izan daitezen, eta Oiartzungo EH Bildu haiei begira jarri da. Izan ere, duela lau urte egin bezala, herri programa osatu nahi du, Oiartzunen egoera diagnostikatu eta landu beharreko ildoak zehazteko.
Gogorarazi dutenez, orain dela lau urteko prozesutik ateratako irizpideen araberako politika eta ekintzak aurrera eramaten ari da zinegotzi taldea. 2019 eta 2023 urteen arteko agintaldirako ildoak zehaztu nahi dituzte, eta horretarako esparruz esparruko diagnosia egingo dute, lehen fase batean. Prozesu guztiaren berri emateko, zein bileraren egutegi eta plangintza ezagutarazteko, bilera egingo dute ostegunean (hilak 31). Alkartetxean (Euskal Herria plaza, 8) izango da bilera, 19:00etan hasita.
“Lehen fasean arloz arloko egoeraren diagnostikoko bilerak egingo dira, datozen lau urteetan EHBilduren ildoei jarraituz zein ekintza egin behar ditugun hitz egingo dugu”, berretsi du Oiartzungo EH Bilduk. “Horretarako”, jarraitu dute oiartzuar ezkertiar, euskaltzale, feminista, ekologista guztiak bileretan parte hartzera animatu nahi ditugu”. Honakoa izango da esparrukako bileren egutegia:
- Gazteria: Ekainak 1, 19:00etan, gaztetxean.
- Kirola: Ekainak 9, 10:00etan, udaletxeko pleno aretoan.
- Kultura: Ekainak 16, 10:00etan, Haurtzaro Ikastolako jantokian.
- Herri antolaketa-auzoak-ingurumena: Ekainak 16, 10:00etan, Haurtzaro Ikastolako jantokian.
- Sozioekonomia: Ekainak 20, 18:30ean, udaletxeko pleno aretoan.
- Feminismoa: Ekainak 30, 10:00etan, udaletxeko bilera gelan edo pleno aretoan.
- Euskara: Uztailak 14, 10:00etan, Fermiñenen.
- Hezkuntza: Zeharlerro moduan, alor guztietan txertatuko dute. Irailean saio bat antolatuko dute gaia aztertu eta ondorioak ateratzeko.
