Oiartzungo antzerki taldeak 'Futbol partida' taularatuko du asteburuan, sesio bikoitzean; Achille Campanileren testua izango du oinarri
Txinalkakoak Josune Cousillas Kultura zinegotziarekin, saioetara joateko gonbita luzatzeko argazkian.
Txinalka Oiartzungo antzerki taldeak urteroko emanaldiak eskainiko ditu larunbat eta igandean. Tessa Andonegiren zuzendaritzapean,
Futbol partida antzezlana taularatuko dute. Achille Campanile italiarraren
Campionato di calcio ovvero far l’amore non è peccato (
Futbol txapelketa edo amodioa egitea ez da bekatu, euskaraz) obraren euskarazko estreinaldia izango da.
Orereta Ikastolako irakasle Aitzpea Aizpuruak itzuli zuen lana. Txinalkakoek
Oiartzun Irratiari adierazi diotenez,
road movie antzeko bat da, bidai bat. 1935ean kokatuta dago, eta oso korala da: jatorrizko bertsioan 31 pertsonaia daude. Txinalkan, futbol talde bat osatzeko bezain beste aktore daude, baina bakoitzak pertsonaia bat baino gehiago jokatuko du.
Honako aktore hauek osatzen dute, Campanile eta Andonegirekin batera, fitxa teknikoa: Udane Altuna, Pili Arbelaitz, Usoa Arbelaitz, Jesus Gonzalez, Nati Gonzalez, Amaia Ibarguren, Izaskun Llona, Marga Maritxalar, Luix Mitxelena, Martin Otazo eta Ekain Susperregi.
Jatorrizko bertsioaren moldaketak daude. Izan ere, obra estreinatu zenean —1972an— oraindik hamabi urte zituen futbolari bat agertzen da obran. Gainera, Euskal Herrian kokatuta dago, Italian beharrean.
Oiartzungo Udalak, Josune Cousillas Kultura zinegotziaren bitartez, saioetara joateko deia luzatu zuen. Antzerki taldea orain dela lau urte pasatu zen udalak sustatuta izatera, eta egonkortasuna dute ordutik. Cousillasek bide beretik joateko opa die antzerki taldekoei.
Hilaren 2an eta 3an
Larunbateko emanaldia 20:00etan hasiko da. Igandekoak, berriz, Oiartzungo Antzerkizaleen Elkartearen ordutegiari ez dio hutsik egingo: 19:00etan hasiko baita. Bi saioak udaletxeko pleno aretoan izango dira, eta sarreraren prezioa bost eurokoa izango da.
Azkeneko entseguak egiten ari dira 11 aktoreak, eta epaileak txilibitua jotzea besterik ez da falta oihaltzarra zabaltzeko.
